मोरङ जिल्लाको १ र ३ निर्वाचन क्षेत्रमा जसपाले छान्यो उम्मेद्वार

मोरङ । मंसिर ४ गते हुन गइरहेको चुनावको लागि पार्टीहरुले उम्मेद्वार छान्न थालेका छन् । केन्द्रमा गठबन्धन दलले आफ्नै तरिकाले चुनावी हिसाबकिताबमा लागेपनि पार्टीहरुले जिल्ला तथा निर्वाचन क्षेत्रबाट उम्मेद्वारको छनौट शुरु भएको हो । छानिएका उम्मेद्वारलाई गठबन्धनले टुंगो लगाउनसक्ने भएकोले पनि तलबाट उम्मेद्वार छानिएको पार्टीहरुले जनाएका छन् ।

यसैक्रममा जनता समाजवादी पार्टी, नेपाल (जसपा)ले मोरङ जिल्लाको १ र ३ निर्वाचन क्षेत्रमा उम्मेद्वारको चयन गरेको छ । मोरङ जिल्लाको क्षेत्र नं. ३ बाट प्रतिनिधि सभाका लागि लोकसागर साम्बाको नाम सर्वसम्मत सिफारिस गरेको छ । साम्बा पार्टीका केन्द्रीय सदस्य हुन् । जसपा, नेपाल ३ नं. क्षेत्र समन्वय समितिको बैठकले साम्बाको नाम सर्वसम्मत सिफारिस गरेको हो ।

त्यस्तै प्रदेश (क) मा केदार धिमाल र प्रदेश (ख) मा शान्ता मोक्तान तामाङको नाम सिफारिस भएको छ । प्रदेश सभाका लागि सिफारिस भएका धिमाल जसपा, लिम्बुवान राष्ट्रिय समितिका मुख्यसचिव हुन् भने तामाङ पार्टीका केन्द्रीय सदस्य हुन् ।

Advertisement

प्रतिनिधि सभाको समानुपातिकमा पार्टीका केन्द्रीय सल्लाहकार समिति सदस्य रामकाजी राई, प्रदेश सभाका लागि समानुपातिकमा तिलक राई र दिलबहादुर तामाङको नाम सिफारिस भएको छ ।

त्यस्तै मोरङ क्षेत्र नं. १ बाट प्रतिनिधिसभामा पुर्ण कुरुम्बाङ र दुर्गाप्रसाद दर्लामी मगरको नाम सिफारिस भएको छ भने समानुपातिकतर्फ रामप्रसाद धिमाल (बाङ्गाई) को नाम सिफारिस भएको छ । त्यस्तै प्रदेश (क) मा विशाल आङ्देम्बे, सुर्यबहादुर माझी, रामकुमार राई र सुनिता थक्सु लिम्बुको नाम सिफारिस भएको छ ।

प्रदेश (ख) छत्र चेम्जोङ र शान्ता राईको नाम सिफारिस भएको छ । समानुपातिकतर्फ भने शुक्रमणि सन्थाल, सावित्रा याख्खा र बविता दनुवारको नाम सिफारिस भएको छ ।