पूर्वसंयोजक गुरुङको स्मृतिमा साहित्यिक व्यक्तित्वलाई पुरस्कृत गर्ने श्रृङ्खलाको घोषणा

हङकङ साहित्यिक साझा श्रृङ्खलाले पूर्वसंयोजक स्व. लालबहादुर गुरुङको स्मृतिमा नगद राशीसहित प्रत्येक वर्ष एकजना साहित्यिक व्यक्तित्वलाई पुरस्कृत गर्ने भएको छ । सोमबार याउमा तेईस्थित एकीकृत नेपाली समाज (हिन्स )को सभाकक्षमा सम्पन्न शृङ्खलाको १४२ औँ संस्करण कार्यक्रममा ताम्रापत्रसहित सम्मानित पुरस्कार दिने निर्णय गरेको हो ।

यसका साथै, पूर्वघोषित पुरस्कारहरूलाई निरन्तरता दिँदै आगामी मे महिनाको अन्तिम आइतबार श्रृङ्खलाको १३औँ वार्षिक उत्सव मनाउने घोषणा पनि गरिएको छ ।

श्रृङ्खलाका संयोजक रमन गुरुङको अध्यक्षता रहेको उक्त कार्यक्रममा श्रृङ्खलाका संरक्षक दाजु गुरुङ, राजकुमार राई, पहिलो संयोजक चन्द्र मादेन ‘आन्छन्’, डा. चेतकुमारी गुरुङ, सल्लाहकार टिवी याक्खा, सुनिता गिरी, बज्रकुमार राईलगायतको आतिथ्य रहेको थियो ।

Advertisement

सो संस्करणमा अग्रज साहित्यिक व्यक्तित्वहरूद्वारा आ–आफ्ना विचार राखिनुका साथै साहित्यिक सिर्जनाहरू वाचन गरिएको थियो । जसमा कवि नूनु रानाले कवि समित बैरागीको कवितासङ्ग्रह ‘साहीमासा’ भित्रका कवितावाचन गरेकी थिइन् भने गजलकार सुन्दर गुरुङ, बज्रकुमार राई, कवि सुनिता गिरी, जानु काम्बाङ लिम्बू, रमण गुरुङ, डोम राना, अरुणा शर्मा, विष्णु मुखिया, खुसी लिम्बूलगायतका सर्जकले आ–आफ्ना सिर्जना वाचन गरेका थिए ।

कार्यक्रममा नेपालबाट प्राप्त भएका साहित्यिक पुस्तकहरू दीपक सुवेदीकृत ‘हङकङको नेपाली साहित्य र अन्य समालोचना’, कवि समीप वैरागीको ‘साहीमासा’ (कविता सङ्ग्रह) र म्यामराज राईको लघुकथासंग्रह ‘बुन्छत’ विमोचन गरिएको थियो ।

सहसंयोजक रोशन यक्सोको उद्घोषण र पूर्वसंयोजक अरुणा शर्माको स्वागत मन्तव्यबाट सुरु गरिएको सो श्रृङ्खलामा कवि तथा लेखक नरेन्द्र गुरुङ र बालकवि सुनिष्का याक्खाको पनि उपस्थिति रहेको थियो।

श्रृङ्खलामा पहिलोचोटि आएका डा. चेतकुमारी गुरुङ, खुसी लिम्बू र नागरिक आवाजका सम्पादक दिलिप राईलाई संयोजक रमण गुरुङले डायरी र कलम उपहारसहित खदा लगाएर स्वागत गरेका थिए।

कार्यक्रममा चित्रकार दिपेन्द्र राईले ‘दृष्टिका भगवान्’ भनेर चिनिएका डा. सन्दुक रुइतको चित्र कोरेर प्रदर्शन गर्दै उनको व्यक्तित्वबारे बोलेका थिए।

वार्षिकोत्सवमा श्रृङ्खलाको वार्षिक मुखपत्र विमोचन गर्नुका साथै घोषणा गरिएका सबै पुरस्कार प्रदान गरिने भनिएको छ।