अमेरिका र इजरायलको आलोचना गर्नेहरूलाई अमेरिकाले भिसा नदिने

काठमाडौं । अमेरिकामा पढ्न चाहने विदेशी विद्यार्थी र अन्यका लागि समेत अब भिसा प्रक्रिया जटिल हुने संकेत देखिएको छ । अमेरिकी विदेशमन्त्री मार्को रुबियोले आफ्ना कूटनीतिज्ञहरूलाई विदेशी विद्यार्थी र अन्य प्रकारका भिसा आवेदकहरूको सामाजिक सञ्जाल नियालेर मात्रै भिसा प्रक्रिया अघि बढाउन निर्देशन दिएका छन् ।

द न्युयोर्क टाइम्सलाई एक अमेरिकी कर्मचारीले बताएअनुसार अमेरिका र इजरायलको आलोचना गर्नेहरूलाई भिसा नदिन यस्तो कदम चालिएको हो ।

विदेशमन्त्री रुबियोले मार्च २५ मा विश्वभरका अमेरिकी कूटनीतिक मिसनहरूलाई पठाएको एक विस्तृत निर्देशनमा सामाजिक सञ्जाल जाँचको विषय समावेश छ । सो निर्देशनअनुसार अमेरिकी वाणिज्य दूतावासका कर्मचारीहरूले कतिपय विद्यार्थी र एक्सचेन्ज भिजिटर भिसा आवेदकहरूलाई ‘फ्रड प्रिभेन्सन युनिट’ मा अनिवार्य रूपमा पठाउनुपर्ने र त्यहाँ उनीहरूको सामाजिक सञ्जाल गतिविधिको मिहिन अध्ययन गर्नुपर्नेछ ।

Advertisement

नयाँ नियम अनुसार विद्यार्थी र एक्सचेन्ज प्रोग्रामका भिसा आवेदकहरूको सोसल मिडिया पोस्ट, कमेन्ट तथा एक्टिभिटीहरू परीक्षण गरिनेछन् । कसैले अमेरिकी मूल्य–मान्यता, संस्कृति, सरकार वा नीतिहरूप्रति द्वेष फैलाएको पाइएमा भिसा अस्वीकृत हुने सम्भावना रहनेछ । विशेषगरी एफ, एम र जे भिसा (विद्यार्थी तथा एक्सचेन्ज कार्यक्रम) का आवेदकहरूको सोसल मिडिया एक्टिभिटी हेरिने भएको हो ।

गत जनवरीमा राष्ट्रपति डोनाल्ड ट्रम्पले जारी गरेको कार्यकारी आदेशकै प्रावधानअनुरुप हाल अमेरिकाले विशेषतः विदेशी विद्यार्थी र अन्य नागरिकको सामाजिक सञ्जाल जाँच गर्ने नीति अवलम्बन गर्न लागेको हो । ट्रम्पको कार्यकारी आदेशमा अमेरिका विरोधी धारणा राख्ने विदेशी नागरिकहरूलाई देशबाट निष्कासन गर्ने अभियानको थालनी गरिने उल्लेख थियो ।

इजरायलको गाजामा चलिरहेको युद्ध विरुद्धका प्रदर्शनमा भाग लिएका विदेशी विद्यार्थीहरूलाई निष्कासन गर्ने गरी ट्रम्पले ‘यहुदीविरोधी गतिविधि नियन्त्रण’ गर्न अर्को कार्यकारी आदेश पनि जारी गरेका थिए ।

भिसा स्वीकृत वा अस्वीकृत गर्ने आधारबारे रुबियोको पत्रमा स्पष्ट निर्देशनहरू समावेश गरिएको टाइम्सको समाचारमा उल्लेख छ । साथै, कस्ता आवेदकको सामाजिक सञ्जाल जाँच गर्ने भन्नेबारे पनि त्यसमा खुलाइएको छ । सोअनुसार आतंकवादी संगठनप्रति सहानुभूति वा सम्बन्ध भएको आशंका गरिएका व्यक्ति, २०२३ अक्टोबर ७ देखि २०२४ अगस्ट ३१ सम्म विद्यार्थी वा एक्सचेन्ज प्रोग्रामका लागि भिसा लिएका, अक्टोबर ७ पछि भिसा खारेज भएका व्यक्तिहरूलाई प्राथमिकतामा राखेर सामाजिक सञ्जाल नियाल्न भनिएको छ ।

२०२३ को अक्टोबर ७ मा हसामले दक्षिण इजरायलमा आम्रकमण गरेको थियो । त्यो बेला १२ सय इजरायलीको ज्यान गएको थियो भने हमासले २५० जनालाई बन्धक बनाएको थियो । त्यसयता इजरायलले गाजामा हवाई तथा स्थल आक्रमण गर्दै आएको छ । गाजाको स्वास्थ्य मन्त्रालयका अनुसार ५० हजारभन्दा बढी प्यालेस्टिनी मारिएका छन् ।