तीनकुने घटनामा ज्ञानेन्द्र शाहको संवेदनशीलता देखिएन: विश्वप्रकाश शर्मा

काठमाडौं । नेपाली कांग्रेसका महामन्त्री विश्वप्रकाश शर्माले तीनकुने प्रदर्शनमा भएको जनधनको क्षतिप्रति पूर्वराजा ज्ञानेन्द्र शाहमा संवेदनशीलता नदेखिएको बताएका छन् ।

बुधवार सिंहदरबारमा सञ्चारकर्मीहरूसँग कुरा गर्दै महामन्त्री शर्माले प्रश्न गरे, ‘फागुन ७ मा अपिल गरेका पूर्वराजाको तीनकुने घटनामा कुनै संलग्नता देखिँदैन ? छैन र ? उहाँलाई दुख्नु पर्दैन र ?’

उनले अगाडि थपे, ‘उहाँको अपिलमा प्रदर्शन भइसकेपछि पत्रकारको मृत्यु हुँदै गर्दा उहाँलाई समवेदना अनुभूति हुनुपर्दैन ? राज्यको सम्पत्ति तोडफोड हुँदा गम्भीर गल्ती भएको महसुस भएको छ भनेर बोल्नुपर्दैन र ? संवेदनशीलता नै देखिएन नि !’

Advertisement

महामन्त्री शर्माले राजतन्त्रमा परिवारवादका आधारमा पुरुषलाई मात्र अवसर मिल्ने भएपनि गणतन्त्रले महिला राष्ट्रपति बनाएको बताए । ‘राजालाई राजगद्दीमा ल्याउने हो भने उहाँ मरेपछि को बस्ने, छोरा, नाति, पनाति ? के यो देश पुरुषहरूको मात्रै हो र ? गणतन्त्रले त दोस्रो राष्ट्रपति नै महिलालाई बनाएको छ नि ! तर राजसंस्थामा त कहिले पनि महिलालाई अवसर नआउने रैछ ।’

महामन्त्री शर्माले तीनकुने घटनाको छानबिन गर्न सरकारले न्यायिक छानबिन समिति गठन गरेर गहिरो अनुसन्धान गर्नुपर्नेमा जोड दिए ।