फेरि एकपटक असली बाजेको पेडा बेच्ने होडबाजी चल्ने भो: डा बाबुराम भट्टराई

काठमाडौं । जनता समाजवादीका राष्ट्रिय अध्यक्ष डा बाबुराम भट्टराईले पुष्पकमल दाहाल प्रचण्डको प्रतिवेदनमाथि टिप्पणी गर्दै कार्यकर्ता झुक्किने बताए ।

काठमाडौंको प्रज्ञा भवनमा जारी रहेको नेकपा माओवादी केन्द्रको आठौं महाधिवेशनमा दाहालले पेश गरेको प्रतिवेदन पढेपछि डा भट्टराईले भने, ‘माओवादी केन्द्रको महाधिवेशनमा प्रस्तुत दस्तावेज सर्सर्ती पढ्दा पुरानै एकदलीय व्यवस्थाको धंगधंगी बोकेको काल्पनिक समाजवादको स्वैरकल्पनाको पोको जस्तो लाग्यो । फेरि एकपटक असली बाजेको पेडा बेच्ने होडबाजी चल्ने भो, अबोध कार्यकर्ता केही बर्ष अरू झुक्किने भए ! शुभकामना !’

प्रचण्डले महाधिवेशनमा २१औं शताब्दीमा समाजवादको नेपाली बाटो शीर्षकको राजनीतिक प्रतिवेदन पेश गरेका थिए ।
।

Advertisement

प्रतिवेदनमाथि छलफल गर्न २५ समूह बनाइएको छ ।

डा भट्टराईले जनतालाई नेताले बाटो देखाउनुपर्नेमा भ्रम छर्न खोजेको आरोपसमेत लगाएका छन् ।

‘क्रान्तिकारी शब्दाडम्बरले झन् परिवर्तनका भोका उत्पीडित वर्ग र समुदायलाई दिशाहीन आवेगमा अल्झाएर बढी नोक्सान गर्छ । जिम्मेवार नेताले जनतालाई बाटो देखाउने हो, भ्रम छर्ने हैन,’ बाबुरामले भनेका छन् ।