April 3, 2025, Thursday
२०८१ चैत्र २१
1:37:26 pm

जसपालाई फूटबाट जोगाउन महन्थ र उपेन्द्रबीच ८ बुँदे सहमति

3K

काठमाडौँ – जनता समाजवादी पार्टीका अध्यक्षद्वय महन्थ ठाकुर र उपेन्द्र यादवबीच ८ बुँदे सहमति भएको छ ।मंगलबार बसेको बैठकले पार्टीलाई फूटबाट जोगाउन दुवै अध्यक्षले ८ बुँदे सहमति गरेका हुन् ।

सहमतिपत्रमा प्रधानमन्त्री केपी शर्मा अ‍ोलीलाई संसदमा विश्वासको मत दिने विषयमा जसपाका सांसदहरुलाई स्वविवेकीय अधिकार प्रयोग गर्न दिएकोमा उक्त अवसरलाई दुरुपयोग गर्दै पार्टीभित्र गुटबन्दी गगरेको भन्दै ध्यानाकर्षण भएको बताउँदै यस्ता कार्य तुरुन्त बन्द गर्नुपर्ने बताइएको छ ।

त्यस्तै पार्टीभित्रका गतिविधिहरु पार्टीको विधान, विधि, प्रक्रिया र संगठनात्मक कार्य प्रणाली अनुरुप गर्नुपर्ने उल्लेख छ । साथै जसपा केपी शर्मा ओली नेतृत्वको सरकारमा नजाने भएको छ । तर, राष्ट्रिय सहमतीय वा आफ्नै नेतृत्वमा सरकार बन्ने अवस्था आएमा अगाडि बढ्न सकिने बताइएको छ ।

Advertisement

‘सरकारमा सहभागी नभई प्रतिपक्षमा नै रही आफ्नो भूमिका निर्वाह गर्ने पार्टीको नीति र निर्णय यथावत कायम रहनेछ । तर, राष्ट्रिय सहमति वा आफ्नो पार्टीको नेतृत्वमा सरकार बन्ने अवसर हुन सक्ने अवस्था भएमा सरकार गठन गर्न अगाडि बढ्न सकिनेछ,’ सहमतिपत्रमा भनिएको छ ।

त्यस्तै पार्टीमा उत्पन्न भएका समस्याहरु आफू संगठित रहेको पार्टी संगठन भित्र छलफल गरी पार्टी विधान अन्तरगत रहेर नै समस्याहरुको समाधान गर्नुपर्नेमा जोड दिइएको छ ।

‘पार्टीभित्र कसैले व्यक्तिगत स्वार्थ सिद्ध गर्नका लागि गुटबन्दी खडा गर्ने, पार्टी नेताहरुकाविरुद्धमा अनेकौं भ्रम फैलाउने, विखण्डन र विभाजनकारी भूमिका खेल्न खोज्ने क्रियाकलाप, विचार प्रकृतिहरुलाई अन्त्य गरी पार्टीलाई एकताबद्ध गराउनुपर्छ’, सहमतिपत्रमा भनिएको छ ।