जसपाको कार्यकारिणी समितिको बैठक बस्दै, महन्थसहित १६ जनालाई हटाइँदै

काठमाडौं- जनता समाजवादी पार्टी नेपाल (जसपा) को केन्द्रीय कार्यकारिणी समितिको बैठक आज (बुधबार) बस्दै छ ।
दिउँसो १ बजे पार्टी केन्द्रीय कार्यालय बालकुमारीमा बस्ने बैठकले नेता महन्थ ठाकुरहित १६ जनालाई कार्यकारिणी समितिबाट हटाउने तयारी भएको नेता मोहम्मद इस्तियाक राईले जानकारी दिएका छन् ।

अध्यक्ष उपेन्द्र यादव पक्षले पार्टीको आधिकारिकता पाएसँगै यसअघि कार्यकारिणी समितिमा रहेका नेताहरुलाई हटाउन लागिएको हो । योसँगै जसपाको कार्यकारिणी समिति ३४ सदस्यीय हुनेछ ।

पार्टीको आधिकारिकताका लागि निर्वाचन आयोगले बहुमत सदस्यको सनाखत गर्दा रेशम चौधरी भने तटस्थ बसेका थिए । उनलाई भने कारबाही नगरिने बताइएको छ ।

Advertisement

हिजो जसपाको कार्यकारिणी समितिको अनौपचारिक बैठक बसेको थियो । बैठकमा नेताहरुलाई हटाउने विषयमा छलफल भएको र आज औपचारिक निर्णय हुने इस्तियाकले जानकारी दिए । त्यस्तै, सांसद पदमा रहेकाहरुलाई भने पार्टीमा रहने/नरहने टुंगो लगाउनका लागि केही समय दिने तयारी छ । उनीहरुलाई स्पष्टीकरण सोध्ने तयारी भएको बताइएको छ ।