यसवर्षको भीमबहादुर स्मृति साहित्य सम्मान सी.पी. शर्मा र पुरस्कार नारद पोखरेललाई

काठमाडौं । यसवर्षको ‘भीमबहादुर स्मृति साहित्य सम्मान’ सिक्किमका वरिष्ठ साहित्यकार तथा समाजसेवी सी.पी. शर्मा भट्टराई र पुरस्कार अमेरिका निवासी भुटानी नेपाली समुदायका विद्वान् डा. नारद पोखरेललाई प्रदान गरिने भएको छ ।

प्रतिष्ठानका संरक्षक सुरेन्द्र परदेशीले एक प्रेस विज्ञप्ति जारी गर्दै चाडै नै धरानमा कार्यक्रमको आयोजना गरी सम्मान तथा पुरस्कार समर्पण गरिने जानकारी दिएका हुन् ।

कीर्तिशेष भीमबहादुर लिम्बूको स्मृतिमा स्थापित यस प्रतिष्ठानद्वारा हरेक वर्ष एकजना विशिष्ट व्यक्तित्वलाई सम्मान र एकजना विशिष्ट व्यक्तित्वलाई पुरस्कार प्रदान गरिँदै आइएको छ ।

Advertisement

बि.सं. २०७९ सालदेखि प्रदान गरिँदै आएको उक्त पुरस्कार सम्मान पहिलो वर्ष सम्मानतर्फ पद्मश्री लीलबहादुर क्षेत्री, भारत र पुरस्कारतर्फ जानु काम्बाङ्ग, हङकङलाई प्रदान गरिएको थियो । त्यसैगरी २०८० सालमा सम्मानतर्फ डा. मधु माधुर्य, अमेरिका र पुरस्कारतर्फ श्री दीपक सुवेदी, झापालाई प्रदान गरिएको थियो ।