राजसंस्था फर्किन्छ भन्ने कुरा दिवा सपना हो: अध्यक्ष नेपाल

२०८२ बैशाख १८

995

काठमाडौं। एकीकृत ट्रेड युनियन महासंघ नेपालले १३६ औँ मे दिवसका अवसरमा मजदुर भेला कार्यक्रम सम्पन्न गरेको छ। बिहिबार अनामनगर काठमाडौँमा उक्त भेला सम्पन्न भएको हो। उक्त कार्यक्रममा प्रमुख अतिथिका रुपमा नेकपा (एकीकृत समाजवादी) का अध्यक्ष माधवकुमार नेपाल उपस्थिति थिए।

अध्यक्ष नेपालले उक्त अवसरमा देशमा संविधान लागू भइसकेपछि १० वर्षको अभ्यासलाई मूल्याङ्कन र समीक्षा गर्नुपर्नेमा त्यसो हुन नसकेको बताए। उनले भने, ‘हाम्रो देशमा पनि २०७२ सालमा संविधान बनायौँ। त्यो संविधानमा जनताका मौलिक हक र अधिकारलाई सुनिश्चित गर्नुपर्ने काम पनि गरिएको छ। गाँस, बास, कपास, शिक्षा, स्वास्थ्य, रोजगारीका अधिकारलाई सुनिश्चित गर्ने गरी संविधानमा व्यवस्था गरिएको छ।’

अध्यक्ष नेपालले अगाडि भने,‘अस्ति भर्खरै देख्नुभयो, इतिहासमा हराइसकेको राजसंस्थालाई फर्काउन मान्छेहरूले कोसिस गरेका थिए। उनीहरूले हामीले गरेकै कार्यक्रमको दिनमा अर्को आमसभा गरे। उनीको आमसभा अत्यन्तै हिंसात्मक रह्यो, हाम्रो पार्टी कार्यालयमा आगो लगाए। समान चोरेर लगे, तोडफोड गरे, यति सम्मकी मेरो घरमा पनि आक्रमण गरे। व्यापारीहरूको पसलमा पनि आगजनी गरे। निजी घरहरूमा पनि आक्रमण गरे र उनीहरूले आफ्नो वास्तविक रूप देखाए। त्यही दिन समाजवादी मोर्चाले गरेको कार्यक्रम शालीन, प्रभावशाली र संस्कारी रहेको थियो। ‘हाम्रो कार्यक्रमले जनतामा उत्साह बढायो, राम्रो सन्देश दियो। प्रतिगामीहरूले गरेको कार्यक्रमले जनतामा वितृष्णा बढायो। त्यसैले राजसंस्था फर्कने सम्भावना छैन। कसैले कल्पना गरेको छ भने त्यो सपना नदेख्न म आग्रह गर्छु।’