साहित्यिक पत्रकार संघद्वारा दुई पुस्तक लोकार्पित

काठमाडौं । कवि किशनसिंह धामीको कवितासङ्ग्रह ‘सम्बोधनमा छ‍‍ोरी’ र डा. हिरण्यलाल ज्ञवालीको समालोचनाकृति ‘एटलान्टिकका भँगालामा डुबुल्की मार्दा’को लोकार्पण सम्पन्न भएको छ ।

साहित्यिक पत्रकार संघ (सापस)को आयोजनामा सम्पन्न लोकार्पण कार्यक्रमलाई प्रमुख अतिथि नेपाल प्रज्ञा-प्रतिष्ठानका पूर्व उपकुलपति साहित्यकार विष्णुविभू घिमिरेले दीप प्रज्वलन गरी उद्घाटन गरेका थिए ।

साहित्यिक पत्रकार संघका अध्यक्ष राधेश्याम लेकालीको सभापतित्वमा सम्पन्न उक्त समारोहमा आमन्त्रित अतिथिहरूको स्वागत गर्दै सभापति लेकालीले साहित्यकार किशनसिंह धामीको योगदानको चर्चा गरेका थिए।

Advertisement

कार्यक्रममा समालोचक डा. हिरण्यलाल ज्ञवालीले लेखेको समालोचनाकृति ‘एटलान्टिकका भँगालामा डुबुल्की मार्दा’बारे वरिष्ठ समालोचक प्रमोद प्रधानले समीक्षात्मक मन्तव्य राखेका थिए। ज्ञवालीले कृतिका माध्यमबाट किशनसिंह धामीको कवितायात्राबारे प्रकाश पारेको उनले बताए ।

कवि किशनसिंह धामीको कविताकृति ‘सम्बोधनमा छोरी’बारे वरिष्ठ समालोचक प्रा. डा. लक्ष्मणप्रसाद गौतमले समीक्षात्मक मन्तव्य राखेका थिए ।

कार्यक्रममा प्रमुख अतिथि विष्णुविभू घिमिरेले लेखक र कविद्वयप्रति शुभकामना व्यक्त गर्दै नेपाली साहित्यमा समयान्तर हिसाबले विभिन्न विधाले फड्काे मार्दै तीव्रगतिले अघि बढिरहेकाेमा प्रसन्नता प्रकट गरे।

यसैगरी कार्यक्रममा विशेष अतिथिहररू नेपाल स्रष्टा समाजका अध्यक्ष श्रीओम श्रेष्ठ ‘रोदन’, समालोचक डा. हिरण्यलाल ज्ञवाली लगायतले आआफ्नो मन्तव्य राखेका थिए।

कार्यक्रममा कवि सन्ध्या पहाडीले कवि धामीको लोकार्पित कृति ‘सम्बोधनमा छोरी’ कृतिबाट कविता वाचन गरेका थिए । कार्यक्रमको संचालन साहित्यकार मुरारी सिग्देलले गरेका थिए।

कार्यक्रममा तारा-किशन फाउन्डेसन, न्यूयोर्क, अमेरिकाको सहकार्य रहेको थियो । कार्यक्रममा प्रा. डा. गोविन्दमानसिंह कार्की, पवन आलोक, शंकर भारती, विमल भौकाजी, जयदेव भट्टराई, गोपीकृष्ण ढुंगाना, तुलसीहरि कोइराला, गणेश घिमिरे (अस्ट्रेलिया), डा. काशीराज पाण्डे, प्रदीप सापकोटा, ध्रुवराज पुरुष, रन्जना निरौला, नीता श्रेष्ठ, उषा के. सी., रितु कँडेल, रमेश दाहाल, टीकाराम आचार्य, विशाल पहाडी, डा. बोधराज पौडेल, यशोदा अधिकारी, डिल्लीरमण सुवेदी, जीवनकुमार श्रेष्ठ, कपिल ज्ञवाली, रामसिंह विष्ट, बालकृष्ण श्रेष्ठ लगायतको उपस्थिति रहेको थियो ।