गजल

सविन सिटौला

जडान भएर समेत बनेका केही भार फेर्दैछु
खुसीका झट्का नआउने जीवनका तार फेर्दैछु

बालुवाको छोडेर सिन्काको घर बनाउन लाग्यौ?
होइन बाबा, म त आफ्नै रहरको दरबार फेर्दैछु

Advertisement

मलाई सोध्नुहोस् न मायालु छक्क पार्ने सूत्र
हरप्रहर उनलाई भेट्छु हरखेप उपहार फेर्दैछु

अब त पस्न सक्छन् हात्ती जत्रा खुसीहरू
पर्दा फेरिसकेँ, यो मनको प्रवेशद्वार फेर्दैछु

पौडिने आँट के आयो पारिको संसारले मन खायो
वर्षौंदेखि गुजारा गरी बसेको किनार फेर्दैछु

तेह्रथुम