डुअर्स आइडल उमेश क्षेत्री भ्वाइस अफ नेपाल सीजन ३ बाट बाहिरिए

‘भ्वाइस अफ नेपाल सिजन ३’ को आज भएको प्रतियोगिताबाट एक भारतीय प्रतिस्पर्धी उमेश क्षेत्री बाहिरिएका छन् । भारतको डुअर्सबाट प्रतियोगितामा भाग लिन नेपाल आएका नेपालीभाषी उमेश डुअर्स आइडल च्याम्पियन समेत हुन ।

उमेशले आफ्नो कोच दीप समूहकै प्रतिद्धन्दी प्रिया गुरुङसंग प्रविन बेडवल र समीक्षा अधिकारीको “नबोले नबोले तिमीसित नबोले” बोलको युगल गीतमा प्रतिस्पर्धा गरे । तर उक्त गीत नेपालको पश्चिमी भाकाको हुनाले उमेशलाई भन्दा प्रियालाई भाखा टिप्न सजिलो परेको थियो । प्रस्तुतिपछि कोच दीपले प्रियालाई अर्को चरणका लागि लिएपछि उमेश क्षेत्री यस पटकको प्रतियोगिताबाट बाहिरिने तेस्रो भारतीय बनेका छन् ।

आज भएको अर्को प्रतियोगितामा टीम तृष्णाबाट सुमन नेपाली र सुरक्षा मल्लले चलचित्र गाजलूको गीत “तिमी आयौ नयनको मझेरी” बोलको गीतमा आ-आफ्नो प्रतिभा प्रदर्शन गरे । प्रस्तुतिपछि कोच प्रमोदले सुरक्षालाई र कोच दीपले सुमनलाई छाने पनि कोच राजु भने न्युट्रल रहे । तर कोच तृष्णाले आफ्नो समूहबाट सुरक्षालाई लिएपछि सुमन अर्को चरणमा जान पाएनन् ।

Advertisement

उता टीम राजुबाट भने आज कपिल पुन र बिजय थापा मगर सबिन राईको “दिन र रात” बोलको गीतमा भिडे । दुबैले उत्तिकै राम्रो गरेको भएपनि कोच राजुले “आजको पर्फर्मेन्सको आधारमा” भन्दै बिजय थापा मगरलाई अर्को चरणको लागि छानेपछि कपिल पुनले पनि आज भ्वाइस अफ नेपाल छोड्नु पर्यो ।

आज भएको चौथो तथा अन्तिम प्रतिस्पर्धामा टीम प्रमोदबाट सुरक्षा सिन्चुरी र यस पटकको च्याम्पियन बन्ने बलियो सम्भावनाको रुपमा लिइएका किरण गजमेरले चलचित्रका बर पिपलबाट आनन्द कार्की र सुनिता सुब्बाले गाएको युगल गीत “जनम जनम ज्युँला संगै” गीतमा प्रतिस्पर्धा गरे । दर्शक दिर्घाबाट वाह! वाह! को आवाज सुनिसकेपछि चारै जना कोचहरुले उनीहरुको प्रस्तुतिलाई म्युजिक भिडियो स्तरको भनी खुब तारिफ गरे ।

कोच प्रमोदले आफ्नो टीमबाट अमेरिकाबाट भ्वाइस अफ नेपाल च्याम्पियन बन्ने सपना लिएर नेपाल आएका किरण गजमेरलाई लिएका छन् । तर टीम प्रमोदबाट सुरक्षा सिन्चुरी बाहिरिए पनि उनलाई कोच तृष्णाले आफ्नो टीममा लिएकी छिन् ।

प्रतियोगिताको १६औं श्रृङखलामा शनिवार पनि चार वटा टीमबाट आठ जना प्रतिस्पर्धीहरु भाग लिंदैछन् ।

पुरा भिडियोको लागि युट्युब लिंक: