सङ्गीत तथा नाट्य–प्रतिष्ठानद्वारा दुई म्युजिक भिडियो र सात अडियो गीत सार्वजनिक

काठमाडौँ । नेपाल सङ्गीत तथा नाट्य–प्रतिष्ठानद्वारा २ म्युजिक भिडियो र ७ वटा अडियो रेकर्ड गीत सार्वजनिक भएको छ ।सोमबार अपरान्ह नक्सालस्थित प्रज्ञा–प्रतिष्ठानको कार्यालय भवनमा आयोजित कार्यक्रममा ‘तीते तीते…’ बोलको गीत र लहविरे भाकाको गीतको म्युजिक भिडियो र गणतन्त्र दिवस २०८१ को अवसरमा आयोजना गरिएको राष्ट्रिय गीत लेखन प्रतियोगितामा विजयी ८ वटा प्रदेशका गीतको अडियो रेकर्ड सार्वजनिक गरिएको हो ।

कार्यक्रमका अध्यक्ष नेपाल सङ्गीत तथा नाट्य प्रज्ञा–प्रतिष्ठानका कुलपति निशा शर्मा पोखरेलले राष्ट्रिय भावना र जनचेतना अभिवृद्धिका लागि म्युजिक भिडियो र गीतहरुको रेकर्ड गरिएको बताइन् ।

यस्तै, राष्ट्रिय भावका गीत तथा राष्ट्रिय गीतको भिडियो सार्वजनिक कार्यक्रमका संयोजक नेपाल सङ्गीत तथा नाट्य प्रज्ञा–प्रतिष्ठानका उपकुलपति शम्भू राईले विदेशी संस्कृतिको हस्तक्षेप बढिरहेको सन्दर्भमा मौलिक नेपाली संस्कृतिको जगेर्ना र अभिवृद्धिका लागि सबैजना एकजुट हुनुपर्ने बताए। उनले सार्वजनिक गरिएका म्युजिक भिडियो र अडियो गीतहरु प्रज्ञा–प्रतिष्ठानको अफिसियल युट्युव च्यानलमा अप्लोड गरिएकोले सबै जनालाई हेरेर प्रतिक्रिया दिनसमेत अनुरोध गरे ।

Advertisement

प्रज्ञा–प्रतिष्ठानका सदस्य सचिव कुुश्मा महरा ‘प्रगति’ले बजेटको व्यवस्था गरेर अडियो रेकर्ड गरिएका राष्ट्रिय भावनाका सातवटै गीतको भिज्युल बनाउने समेत प्रतिबद्धता जनाए ।

कार्यक्रममा सार्वजनिक भएका भिडियोका निर्देशक र गीतका गीतकार, सङ्गीतकार र गायकगायिकालाई प्रमाणपत्रले सम्मान समेत गरिएको थियो ।

सार्वजनिक भएका भिडियोमध्ये शिक्षासम्बन्धी चेतना फैलाउने ‘तीते तीते…’ गीतको म्युजिक भिडियोलाई अभि लामाले निर्देशन गरेका हुन् । यस गीतको रचना प्रकाश सापकोटा, सङ्गीत महेश खड्का र गायन शान्तिश्री परियारको रहेको छ भने कलाकारमा बिना रावत र अलि तामाङ रहेका छन् ।

त्यसैगरी पूर्वी पहाड ओखलढुङ्गा जिल्लाका बायुङ, थुलुङ र वाम्बुले समुदायले गाउँदै आएको लोपोन्मुख लहबिरे भाकाको गीतमा सङ्गीतकार लाहाङ सुब्बाको सङ्गीत संयोजन र गायक कुमार प्रयास, परेश राई र तेजकुमार राई तथा गायिका इन्द्रकला राई, मनमाबी राई र रश्मी राईको स्वर रहेको छ । यस गीतको म्युजिक भिडियोलाई पनि निर्देशक अभि लामाले नै निर्देशन गरेका छन् ।

राष्ट्रिय गीत लेखन प्रतियोगिता–२०८१ मा छनोट भएका ७ वटा प्रदेशका गीतमा कोशी प्रदेशबाट तेजकुमार राईको शब्दलाई महेश खड्काको सङ्गीत र सन्दीप पनेरु र प्रिया पोखरेल पनेरुको स्वर रहेको छ ।

मधेस प्रदेशबाट लिलाराज दाहालको शब्द रचनालाई बसन्त सापकोटाको सङ्गीतमा प्रल्हाद तिमल्सिना र मनिसा सुनारले स्वर गरेका छन् । त्यसैगरी बागमती प्रदेशबाट सृजना अर्यालको शब्दलाई शान्तिराम राईको सङ्गीतमा रोशन राईको गायन रहेको छ । लुम्बिनी प्रदेशबाट बसन्तकुमार आचार्यको गीतमा आशीष अविरलको सङ्गीत र स्वर रहेको छ । कर्णाली प्रदेशबाट क्षितिज समर्पणको गीतलाई महेश खड्काको सङ्गीतमा मिलन खपाङ्गी र मिना चौधरीले स्वर भरेका छन् । सुदूर पश्चिमबाट धिरन नाथको गीतलाई शान्तिराम राईको सङ्गीतमा रोशन राईको स्वर रहेको छ भने गण्डकी प्रदेशबाट बाबुराम श्रेष्ठको गीतलाई श्रीकृष्ण बम मल्लको सङ्गीतमा लक्ष्मी मल्ल, सारिका घिमिेरे, उषा गजुरेल र योगेश काजी शाहले स्वर दिएका छन्।

कार्यक्रममा प्रज्ञा–प्रतिष्ठानका ४ जना कर्मचारीलाई पनि सम्मान गरियो । सम्मानित हुनेमा अधीकृत स्तरका प्रदीप गुरागाईं, प्रविन सापकोटा, ध्रुव वाग्ले र नायब सुब्बा जगदीश सापाकोटा छन् ।