स्वास्थ्यमन्त्री बस्नेत र बेलायतका स्वास्थ्य राज्यमन्त्री विल क्वीन्सबीच भेटवार्ता

लन्डन । संयुक्त अधिराज्यका स्वास्थ्य राज्यमन्त्री विल क्वीन्स र नेपालका स्वास्थ्य तथा जनसङ्ख्यामन्त्री मोहनबहादुर बस्नेतबीच भेटवार्ता भएको छ । दुई मन्त्रीबीच सोमबार संयुक्त अधिराज्यको स्वास्थ्य मन्त्रालयमा भटेवार्ता भएको हो ।

लन्डन दुतावासका अनुसार भेटमा स्वास्थ्य मन्त्री बस्नेतले बेलायत सरकारले नेपालको आर्थिक र सामाजिक विकास विशेषगरी स्वास्थ्य क्षेत्रमा पुर्याएको सहयोगको प्रशंसा गर्दै आगामी दिनमा यसमा थप अभिवृद्धि हुने विश्वास व्यक्त गरेका छन् ।

मन्त्री बस्नेतले नेपाल र बेलायतबीच हालै सम्पन्न बेलायतमा नेपाली नर्सका लागि रोजगारी सम्बन्धी सम्झौताप्रति खुसी व्यक्त गर्दै नेपाली स्वास्थ्य संस्थाको क्षमता अभिवृद्धिका लागि सहयोग गर्न अनुरोधसमेत गरेका छन् । बेलायती स्वास्थ्यमन्त्री क्वीन्सले नेपालको स्वास्थ्य क्षेत्रमा बेलायतको सहयोग जारी रहने, नेपालको नर्सिङ क्षेत्रको क्षमता अभिवृद्धिमा थप सहयोगका लागि कार्य भइरहेको र नेपाली नर्सहरूको बेलायत आगमनबाट दुई देशका लागि फाइदा पुग्ने बताएका छन् ।

Advertisement

स्वास्थ्य मन्त्री बस्नेतले आइतबार विन्चेस्टरमा रहेको रोयल ह्याम्सायर काउन्टी हस्पिटलको तालिम केन्द्र, इमर्जेन्सी विभाग तथा वार्डहरूको भ्रमण गरी त्यहाँ नेपालबाट ल्याइने नर्सहरूको तालिम तथा स्थानान्तरण प्रक्रियाका बारेमा जानकारी लिएका छन् । उक्त भेटमा बेलायतका लागि नेपाली राजदूत ज्ञानचन्द्र आचार्यसमेत सहभागी थिए ।