May 27, 2024, Monday
२०८१ जेष्ठ १५
1:37:26 pm

एनआरएनए युकेको नयाँ कार्यसमितिलाई भव्य समारोहबीच बधाई तथा शुभकामना

7.7K

लन्डन। गैरआवासीय नेपाली संघ (एनआरएनए युके) को नयाँ कार्यसमितिलाई भव्यरुपमा कार्यक्रमको आयोजना गरी शुभकामना दिइएको छ । आइतबार अल्डरशटस्थित एम्पायर हलमा नवनिर्वाचित पदाधिकारीहरुलाई विभिन्न संघसंस्थाका प्रतिनिधिहरुले खादा र फेटा लगाएर सम्मान तथा बधाई दिएका हुन् ।

सम्मान कार्यक्रममा एनआरएनए युकेका नवनिर्वाचित अध्यक्ष हित काजी गुरुङले पूर्व गोर्खाहरुको समानताको अधिकार, सम्पत्ति सुरक्षा, नेपाली नागरिकताको निरन्तरता, भाषा संस्कृतिको संरक्षण, पर्यटन प्रवर्धन, युवा तथा विद्यार्थी र सामाजिक रुपान्तरण सहित ८ बुंदे संकल्प पढेर सुनाए । उनले आउँदो २ वर्षका लागि नयाँ कार्यसमितिको कार्ययोजना पढेर सुनाएका थिए ।

उक्त अवसरमा बोल्दै समारोहका प्रमुख अतिथि तथा बेलायतका लागि नेपाली राजदूत ज्ञान चन्द्र आचार्यले गैरआवासीय नेपाली संघ नेपाललाई विश्वमा चिनाउने र संसारभरि फैलिएका नेपालीहरुसँग रहेको सीप, साधन र श्रोत नेपालको हितमा प्रयोग गर्ने कडीको रुपमा रहेको बताए । उनले जुन मुलुकमा नेपाली दूतावास छैनन्, त्यहाँ पनि संघले नेपाली समुदायलाई सहयोग गरिरहेको बताए । राजदूत आचार्यले एनआरएनए युकेको नयाँ कार्यसमितिलाई बधाई र शुभकामना दिंदै युकेमा बसोबास गरिरहेका नेपालीहरुलाई एकतावद्ध गरी सामाजिकता र सहकार्य अभिवृद्धि गर्न सुझाव पनि दिए ।

Advertisement

सांसद सोविता गौतम
सांसद सोविता गौतम

हाल बेलायतको भ्रमणमा रहेकी राष्ट्रिय स्वतन्त्र पार्टीकी सांसद सोविता गौतमले एनआरएनहरुको मातृभूमिप्रतिको मायालाई नेपालले नबिर्सेको बताइन् । उनले एनआरएनहरुलाई नेपाल फर्कन मात्रै हैन नेपालमै टिकाउने वातावरण बनाउनु पर्ने बताइन् । ‘हामी युवा पुस्ता नेपालको राजनीति सम्हाल्न तयार भएर आएका छौं । एनआरएनएमा पनि अब युवा पुस्ताको उदय हुनुपर्छ,’ उनले भनिन् । उनले एनआरएन नागरिकता, सम्पत्ति सुरक्षा लगायत भूतपूर्व गोर्खाको हक अधिकारको लागि व्यक्तिगत र पार्टीको तर्फबाट पनि पूर्ण सहयोग हुने बताइन् ।

गैरआवासीय नेपाली संघका केन्द्रीय अध्यक्ष कुल आचार्यले आउँदो अक्टोबर महिनाभित्र गैरआवासीय नेपाली नागरिकता कार्यान्वयनमा आइसक्ने बताउंदै उक्त नागरिकतालाई सरल र सुविधायुक्त बनाउनेतर्फ आफूहरुले पहल गरिरहेको बताए । उनले सामाजिक सुरक्षा तथा प्रवासमा रहेका नेपालीहरुको मताधिकारको लागि नेपाल सरकारले महत्वपूर्ण निर्णयहरु गरेको बताउंदै संघले नेपाल सरकारसँग सहकार्य जारी राख्ने बताए । उनले एनआरएनए युकेको नयाँ नेतृत्वलाई बेलायतस्थित नेपाली समाजलाई एकजुट गर्न सफलता मिलोस् भन्ने शुभकामना पनि दिए ।

समारोहलाई सम्बोधन गर्दै उपाध्यक्ष हेम राज शर्माले कुनै पनि संस्था वैधानिक हुन कि सदस्यहरुले निर्वाचित गरेको हुनुपर्ने, कि केन्द्रले मान्यता दिएको हुनुपर्ने बताए । ती दुवै हिसाबले हित काजी गुरुङले नेतृत्व गरेको एनआरएनए युके नै एकमात्र वैध संस्था भएकोले कुनैपनि द्विविधामा नपर्न शर्माले बेलायतवासी नेपालीहरुलाई आग्रह गरे । उनले सहकार्य र सहमतिको आधारमा केन्द्रको नयाँ नेतृत्व चयन गर्न पनि आग्रह गरे । उपाध्यक्ष महेश श्रेष्ठले संघ अहिले निकै विषम परिस्थितिमा रहेको भन्दै सहमतिको आधारमा संस्थालाई अगाडी बढाउन सक्ने नेतृत्वको आवश्यकता रहेको बताए ।

अर्का उपाध्यक्ष नारायण आचार्यले सहमतिको आधारमा सबैलाई समेट्न सक्ने नेतृत्व चयन गर्न आग्रह गरे । गैरआवासीय नेपाली संघका महासचिव डा केशव पौडेलले एनआरएनए युकेको निर्वाचनले एउटा उदाहरण प्रस्तुत गरेको बताउंदै अब संघमा आउँदो दस वर्षको भिजनसहित सक्षम नेतृत्व आउनु पर्ने बताए ।

गैरआवासीय नेपाली संघका केन्द्रीय अध्यक्ष कुल आचार्य
गैरआवासीय नेपाली संघका केन्द्रीय अध्यक्ष कुल आचार्य

त्यस्तै युवा उपाध्यक्ष राज रेग्मीले एनआरएनएले मध्यपूर्वमा कार्यरत २० लाख भन्दा बढी नेपालीहरुको एजेन्डालाई अगाडी बढाउनु पर्ने बताए । उनले नेपालीहरुले प्रवासमा आर्जन गरेको ज्ञान, सीप र सानोसानो पूँजीलाई एकत्रित गरेर नेपालमा लगानी गर्नु पर्ने बताए । उनले संघमा व्यक्तिगत स्वार्थ र इगोलाई छाडेर सामूहिकताको आधारमा अगाडी बढ्न पनि सुझाव दिए ।
समारोहमा गैरआवासीय नेपाली संघका उप महासचिव रामशरण सिम्खडा, सचिव गङ्गाधर गौतम, युरोप उपसंयोजकद्वय दयानिधि शर्मा तथा कृष्ण तिमल्सेना, युरोप युवा उपसंयोजक रोवर्ट लिम्बु, पूर्व सल्लाहकार विश्वआदर्श पण्डित, जनसम्पर्क समिति युकेका अध्यक्ष युवराज गुरुङ, एनआरएनए अमेरिकाका पूर्व अध्यक्ष बुद्धि सुवेदी, एनआरएनए क्यानडाका पूर्व अध्यक्ष दिपक गौतम,एनआरएनए पोर्तुगलका पूर्व अध्यक्ष भिम कमल के सी, एनआरएनए क्यानडाका पूर्व अध्यक्ष दिपक गौतम पूर्व आइसीसी सदस्य अनुजा प्रधान, प्रवासी नेपाली मंच युकेका अध्यक्ष तुङ्ग भद्र भुसाल नेपाल पत्रकार महासंघ युकेका पूर्व अध्यक्ष चिरन शर्मा लगायतले शुभकामना दिएका थिए ।

उक्त अवसरमा ‘रोयल बरो अफ ग्रीनविच’का उपमेयर काउन्सिलर जीत रानाभाटले एनआरएनए युकेको नयाँ नेतृत्व बेलायतस्थित नेपाली समाजलाई एकतावद्ध पार्न सफल होस् भन्ने शुभकामना दिंदै भूतपूर्व गोर्खा लगायत बेलायतवासी नेपालीहरुको हकहितका लागि स्थानीय काउन्सिलहरुसँग मिलेर काम गर्न सुझाव दिए ।

एनआरएनए युकेका महासचिव गोविन्द खरेलले संचालन गरेको कार्यक्रममा चर्चित जनवादी गायक जीवन शर्माले लोकप्रिय गीतहरु सुनाएका थिए भने सुदीप क्षेत्री लगायतका कलाकारहरुले पनि गीतसंगीतबाट सहभागीहरुलाई नचाएका थिए ।

उक्त अवसरमा विदेशबाट आएका एनआरएनएका पदाधिकारीहरु तथा निर्वाचन समितिका सदस्यहरुलाई सम्मानपत्र पनि प्रदान गरिएको थियो ।

तस्वीरःमिलन तमु