May 21, 2024, Tuesday
२०८१ जेष्ठ ८
1:37:26 pm

प्रधानमन्त्री प्रचण्ड र बेलायती सेनाध्यक्ष स्यान्डर्सबीच शिष्टाचार भेटवार्ता

670

काठमाडौं। प्रधानमन्त्री पुष्पकमल दाहाल प्रचण्ड र बेलायती सेनाका सेनाध्यक्ष जनरल सर प्याट्रिक स्यान्डर्सबीच शिष्टाचार भेट भएको छ। मंगलबार प्रधानमन्त्री तथा मन्त्रिपरिषद्को कार्यालयमा दुईबीच भेटवार्ता भएको हो ।

भेटमा नेपाल-बेलायत सम्बन्धका साथै आपसी हित र चासोका विविध विषयमा विचारविमर्श भएको परराष्ट्र मन्त्रालयले जनाएको छ । उनीहरूबीच द्विदेशीय सहयोग विस्तारबारे पनि छलफल भएको थियो ।

नेपालको प्रमुख विकास साझेदार बेलायतले नेपालको सामाजिक-आर्थिक उन्नयनका निम्ति निरन्तर सहयोग गरेकामा प्रधानमन्त्री दाहालले हार्दिक आभार व्यक्त गरे ।

Advertisement

शिष्टाचार भेटमा प्रधानमन्त्रीका परराष्ट्र मामिला सल्लाहकार, परराष्ट्र मन्त्रालयका उच्च अधिकारी, नेपालका लागि बेलायतका राजदूत तथा यहाँस्थित बेलायती राजदूतावासका वरिष्ठ अधिकारीहरूको उपस्थिति थियो ।

आजै उनले उपप्रधानमन्त्री एवं रक्षामन्त्री पूर्णबहादुर खड्का तथा प्रधानसेनापति प्रभुराम शर्मासँग बेग्लाबेग्लै शिष्टाचार भेट गरेका थिए ।