कुल आचार्य समुहका एनआरएनए पदाधिकारीहरुले अझैं बुझाएनन् शुल्क

लण्डन । गैर–आवासीय नेपाली संघ (एनआरएनए) का नवनिर्वाचित अधिकांस पदाधिकारीहरुले आफ्नो उम्मेदवारी शुल्क नतिरेको भेटिएको छ । स्रोतका अनुसार मार्च अन्तिम साता भएको १०औं महाधिवेशनमा उम्मेदवारी शुल्क नतिर्नेहरुमा अध्यक्ष कुल आचार्यनिकटवर्तीहरु धेरै छन् ।

सर्वसम्मतबाट चयन भएको सो निर्वाचनमा सपथग्रहण गर्नुअघि नै उम्मेदवारी शुल्क तिर्नुपर्ने निर्देशन जारी गरिए पनि पदाधिकारीहरुले आआफ्नो उम्मेदवारी शुल्क नतिरी सपथ लिएर प्रमाणपत्र बुझेका थिए ।

संघको उम्मेदवारी शुल्क र विभिन्न परियोजनाका लागि गरेका प्रतिबद्धतासहित पदाधिकारीहरुको मात्र करिब ५ करोड रुपैयाँ उठ्न बाँकी रहेको स्रोतले जनाएको छ ।

Advertisement

स्रोतका अनुसार आइसीसी सदस्य शुल्क, सचिवालय संचालन खर्च (लेवी), उम्मेदवारी शुल्क, बिभिन्न परियोजना लगायतको शिर्षकमा पैसा उठ्न बाँकी छ ।

उपाध्यक्ष आरके शर्मा १९ लाख ७० हजार, विष्णुमाया परियार ८ लाख ५० हजार, प्रविण गुरुङ ९ लाख ५० हजार, रोविन्द्र श्रेष्ठ ५ लाख २२ हजार, गंगाधार गौतम ६ लाख ५० हजार, राजन त्रिपाठी ७ लाख, सोम सापकोटा ६ लाख ६५ हजार रुपैयाँ, शुल्क तथा परियोजनामा गरिएको प्रतिबद्धता उठ्न बाँकी रहेको छ ।

एनआरएनए स्रोतका अनुसार बाँकी रहेको बकौता तिर्न पदाधिकारीहरुलाई भोलि शनिवार सम्मको समय दिइएको छ । उम्मेदवारी शुल्क नतिरेका पदाधिकारीहरु संघको बैठकमा उपस्थित हुने वा नहुने भन्ने विषयमा भने संघभित्र अन्योल कायम छ ।

उम्मेदवारी शुल्क नतिर्ने पदाधिकारहरुमा नारायण काफ्ले, योगिता थापा, विमला सापकोटा, कृष्ण दत्ता भट्ट, केशव सापकोटा, पद्मा भण्डारी, पशुपति पाण्डे, युवराज न्यौपाने, सरिता भण्डारी, बन्दना कोइराला, वर्षा खड्का, सरिता भण्डारी, सञ्जना कार्की, सागर उप्रेती, अफ्रिका विनोद रुवाली (सुरेश), बालकृष्ण मरासिनी, खुश्बु घिमिरे, सुनिता थापा, दीपक न्यौपाने र विजय धामी रहेका छन् ।

नेपाल ब्रिटेन डटकमबाट साभार ।