जेनजी आन्दोलनको समयमा कारागारबाट फरार जबरजस्ती करणीका अभियुक्त पक्राउ

विराटनगर । जबरजस्ती करणी उद्योग मुद्दामा सप्तरी कारागारमा थुनामा रहेका एक बन्दी फरार भएको झण्डै चार महिनापछि पक्राउ परेका छन् । पक्राउ पर्नेमा सप्तरीको शम्भुनाथ नगरपालिका वडा नं. ३ निवासी ३२ वर्षीय नागेन्द्र कुमार पाल रहेका छन् ।

गएको २०८२ भदौ २५ गते जेनजी आन्दोलनको समयमा कारागारबाट भागेका पाललाई मोरङ प्रहरीले विराटनगरबाट नियन्त्रणमा लिएको हो ।

कारागारबाट फरार भएदेखि नै प्रहरीले उनको खोजी कार्यलाई तीव्र बनाएको थियो । यसै क्रममा वडा प्रहरी कार्यालय विराटनगरबाट खटिएको विशेष टोलीले पुस २७ गते राति करिब पौने १० बजे उनलाई विराटनगर महानगरपालिका–२ स्थित बन्जराचोकबाट फेला पारेको हो ।

Advertisement

पक्राउ परेका पाललाई आवश्यक कानुनी कारबाहीका लागि मोरङ जिल्ला अदालत पठाउने तयारी भइरहेको प्रहरीले जनाएको छ ।