‘जीवनपथ’ गीति म्युजिक भिडियोको प्रिमियर सम्पन्न

काठमाडौं । ‘जीवनपथ’ गीति म्युजिक भिडियो (लघु चलचित्र)को प्रिमियर सो कार्यक्रम सम्पन्न भएको छ । सोमबार डिल्लिबजारस्थित तपस होटलमा सखी प्रतिष्ठानले आयोजना गरेको विशेष कार्यक्रममा भिडियो प्रिमियर गरिएको हो ।

साहित्यकार मन्जिला अनिलको शब्द र चर्चित सङ्गीतकार एवं गायक नरहरी प्रेमीको सङ्गीत र स्वरमा निर्माणाधीन सो म्युजिक भिडियो (चलचित्र)को छायांकन वीरेन्द्र भाट ‘विपिन’ले गरिरहेका छन् ।

उक्त ‘जीवनपथ’ गीति म्युजिक भिडियो सर्जक अनिलनाथ उप्रेतीको जीवनसँग सम्बन्धित कथामा निर्माणाधीन रहेको शब्दकार मन्जिला अनिलले बताए ।

Advertisement

सो कार्यक्रमका प्रमुख अतिथि साहित्यिक पत्रकार संघका अध्यक्ष राधेश्याम लेकाली, कार्यक्रमका सभापति मन्जिला अनिल, विशिष्ट अतिथिहरू शब्दपथका प्रधान सम्पादक किशोर पहाडी, चर्चित सङ्गीतकारहरू सीताराम पोखरेल (नेपाल आयल निगमका पूर्व निर्देशक) र सङ्गीतकार नरहरी प्रेमीले ‘जीवनपथ’ म्युजिक भिडियोको ‘प्रोमो” सार्वजनिक गरेका थिए ।

कवि मीना श्रेष्ठको विशेष उपस्थिति रहेको सो कार्यक्रममा प्रमुख अतिथि राधेश्याम लेकालीले सखी प्रतिष्ठानको उदेश्य, गतिविधि तथा नेपाली साहित्यमा पु¥याएको योगदानको चर्चा गरेका थिए ।

सोही कार्यक्रममा वरिष्ठ कथाकार किशोर पहाडीले कवि मञ्जिलाको शब्द रचनाको प्रशंसाा गर्दै गीति चलचित्र अनिलनाथ उप्रेतीका लागि मञ्जिलाको प्रेमोपहार भएको बताए ।

कार्यक्रममा सङ्गीतकार सीताराम पोखरेलले अनिलनाथ उप्रेतीसँगको आफ्नो सम्बन्ध, सहकार्य, अनुभव र सक्रियताको बारेमा संक्षेपमा प्रकाश पार्दै गीत गाएका थिए ।

सार्वजनिक गरिएको ‘जीवनपथ’ गीति म्युजिक भिडियोका सङ्गीतकार एवं गायक नरहरि प्रेमीले म्युजिक भिडियोबारे चर्चा गर्दै आफूले कर्म गर्दै आएको तर फलको आशा नराखेको बताए । प्रेमीले अनिलनाथ उप्रेतीको जीवनकथामा आधारित मञ्जिला अनिलको शब्दरचनालाई गाउन पाउँदा ज्यादै खुसी भएको भन्दै ‘जीवनको के भरोसा’ बोलको गीत पनि गाएका थिए ।

कार्यक्रममा अनिलनाथ उप्रेतीले कवि मञ्जिलाको शब्दरचना, सङ्गीतकार नरहरी प्रेमीको सङ्गीत र स्वर तथा गीति चलचित्रको प्रशंसाासहित आफ्नो गीत सर्जक कमला रिसालसित संयुक्त गाएका थिए ।

कार्यक्रममा नेपाल आयल निगमका सहकर्मी इन्जिनियर अनुपम पराजुलीलेसमेत शुभकामना मन्तव्य राखेका थिए ।

कार्यक्रममा सखी प्रतिष्ठानकी अध्यक्ष मञ्जिला अनिलले स्वागत मन्तव्य राख्दै आफ्नो शब्दरचनामा गीति लघु चलचित्र प्रदर्शन गर्न पाएकोमा आभार प्रकट गरिन् ।

कार्यक्रममा निशु शर्माले ‘जय होस् तिम्रो मङ्गल होस्’ बोलको गीत गाइन् भने कार्यक्रमको सहजीकरण सखी प्रतिष्ठानकी उपाध्यक्ष कमला रिसालले गरेकी थिईन् ।

कार्यक्रममा साहित्यकारहरू विक्रमभक्त जोशी, सुभाषचन्द्र पौडेल, मधु पाठक, उषा के. सी., तुलसी गिरी, नेपाल आयल निगमका कर्मचारीहरू र अनिलका परिवारजन लगायतको उपस्थिति रहेको थियो ।