गणतन्त्र दिवसको अवसरमा जनयुद्धको कथा ‘तातो गोली’ सार्वजनिक

काठमाण्डौं । नेकपा एकीकृत समाजवादीका पोलिटब्युरो सदस्य दिलु पन्तको शब्द रचनामा गणतन्त्र दिवस २०८० को उपलक्ष्य ‘तातो गोली’ सार्वजनिक भएको छ । गणतन्त्र दिवसको अवसर पारेर सोमबार दर्शक तथा श्रोतामाझ ल्याइएको यस गीत ‘शिशिर योगी युटुव च्यानल’मार्फत सार्वजनिक भएको हो ।

गीतमा लोकप्रिय गायक शिशिर योगीको स्वर, संगीतकार बि.बि. अनुरागीको संगीत तथा संगीतसंयोजन र नेतृ दिलकुमारी पन्तको शब्द रहेको छ । यस्तै, मिक्सिङ श्यामस्वेत रसाइली, बाँसुरी गोपाल देव घतानी र ऋदम कुमार महाराज योगीको रहेको छ ।

गीत सार्वजनिक गर्दै रचनाकार पन्तले आफ्नो सामाजिक सञ्जालबाट २०६२/०६३ मा भएको जनआन्दोलनकै मैदानमा लेखिएको उक्त गीतलाई अहिले सार्वजनिक गरिएको बताएकी छन् । ‘शहीद भिमसेन दाहालको छातीमा गोली लागि मेरै आँखा अगाडि ढल्नुभएको थियो । अनि आफैलाई स्पर्श गरी वारपार हुने गरी टियर ग्याससँगै मडारिएर आउने ताता गोली जनतामाथि बर्सियो । सडकमा आम जनताबाट गणतन्त्रको नारा बुलन्द र घना हुँदै थियो । मलाई लाग्थ्यो ती गोलीहरूले मेरो छाती पनि चिरोस् तर क्रान्तिको आगो निभ्न दिने छैन । यो कसम मेरो मात्र थिएन आम महिला, युवाहरू साथै मजदुर लगायत परिवर्तनकामी आम जनसमुदायको थियो ।’, उनले भनेकी छन् ।

Advertisement

उक्त गितको सार्वजनिक भएसँगै लेखक साहित्यकार पत्रकार धनराज वास्तविक लेख्छन्, ‘जतिबेला एकात्मक राज्यसत्ताकोविरुद्ध सडकमा आन्दोलन जारी थियो, त्यही बेला नेत्री पन्तलेले सडकबाटै रचना गर्नुभएको यो गीतको सान्दर्भिकता अझै पनि जिउँदै छ । व्यवस्था सतहमा मात्रै बदलिएको हो । समाजको अन्तरकुन्तरमा रहेका नश्लवादी, जातिवादी, पक्षपाती चरित्र र प्रवृत्तिहरूको समूल अन्त्य गर्न बाँकी छ । त्यसैले जस्तो सुकै परिस्थितिमा पनि लड्नुपर्छ । गोली लाग्दा पनि छातीहरू दुख्नु हुन्न । चुनौतीलाई सामना गर्दै अघि बढ्नुपर्छ । कदमहरू रोक्नु हुन्न । हामीले यस्तै गीत गाउँदै संघर्षपूर्ण यात्राबाट गणतन्त्र ल्याएका हौं ।’