ओलीको प्रश्नः ‘काँग्रेस तर्साउन लिभिङ टुगेदर चलेकै थियो त,फेरि किन समाजवादी मोर्चा ?’

२०८० असार २

1.7K

काठमडौं । नेकपा एमालेका अध्यक्ष केपी शर्मा ओलीले फरक उद्देश्य भएका तत्वहरु एक ठाउँमा जम्मा भएर राष्ट्रिय शक्ति निर्माण नहुने बताएका छन् । नेकपा माओवादी सहितको ‘समाजवादी मोर्चा’ प्रति टिप्पणी गर्दै उनले त्यसको औचित्य नरहेको बताएका हुन् ।

शनिबार पार्टी कार्यालय च्यासलमा आयोजित कार्यक्रममा बोल्दै ओलीले समाजवादी मोर्चा केबल एमालेसँग मुकाबिला गर्न र कांग्रेसलाई तर्साउनका लागि बन्न लागेको पनि बताए । ‘अब गठबन्धन मात्रै नपुगेर एउटा समाजवादी मोर्चा बनाउने रे । समाजवादी मोर्चा किन बनाउने भन्दा एउटा नेकपा एमालेसँग मुकाबिला गर्न र अर्को काँग्रेस तर्साउन लिभिङ टुगेदर चलेकै थियो त फेरि अर्को किन ?’

उनले ती पार्टीमा भएका व्यक्तिहरूलाई आफूले राम्ररी चिनेको बताउँदै जुनसुकै मोर्चा बनेपनि डराउन आवश्यक नरहेको बताए । त्यस्ता गठबन्धन र मोर्चाले केहीबेर एमालेलाई सत्ताबाहिर राख्नसम्म सक्ने ओलीको भनाई थियो । ‘एकछिन एमालेलाई सरकारबाट बाहिर राख्ने हुनसक्छ,’ उनले भने, ’२०८४ सम्म हुनसक्छ हामी अब मिसन ०८४ को तयारीमा छौँ । हामीलाई कसैले राष्ट्रिय शक्ति बन्नबाट रोक्न सक्दैन ।’