सात सय २८ व्यक्तिलाई मानपदवी, राज्यको ढुकुटीबाट ३४ करोड ५८ लाख रुपैयाँ खर्च

काठमाडौं । राष्ट्रपति रामचन्द्र पौडेलले राष्ट्रको गौरव बढाउन अतुलनीय योगदान गर्ने पूर्वप्रधानमन्त्री स्व.सुशील कोइरालासहित समाजका विभिन्न क्षेत्रका सात सय २८ व्यक्तित्वलाई विभिन्न मानपदवी प्रदान गरेका छन् ।

राष्ट्रपति कार्यालय शीतल निवासमा शुक्रबार आयोजित विशेष समारोहमा राष्ट्रपति पौडेलले एक जनालाई नेपाल रत्न, तीन जनालाई राष्ट्र गौरव, एक जनालाई सुप्रसिद्ध प्रबल जनसेवाश्री, १४ जनालाई प्रसिद्ध प्रवल जनसेवाश्री, १६ जना सुकीर्तिमय राष्ट्रदीप, एक सय ६५ जनालाई सुप्रबल जनसेवाश्री, छ जनालाई कीर्तिमय राष्ट्रदीप, तीन सय १६ जनालाई प्रवल जनसेवाश्री, एक जनालाई राष्ट्रदीप र दुई सय पाँच जनालाई जनसेवाश्री प्रदान गरेका हुन् ।

राष्ट्रपति पौडेलले नेपाल रत्न पूर्वप्रधानमन्त्री स्व।कोइरालालाई प्रदान गरेका छन् । राष्ट्र गौरव राजनीतिज्ञ स्व।जीवराज न्यौपाने ‘आश्रित’, मन्त्रिपरिषद्का पूर्वअध्यक्ष खिलराज रेग्मी र संस्कृतिविद् स्व सत्यमोहन जोशीलाई प्रदान गरे । सुप्रसिद्ध प्रबल जनसेवाश्री डा। जगमान गुरुङलाई प्रदान गरियो । समारोहमा व्यवसायी, संस्कृतिविद्, कलाकार, पत्रकार, समाजसेवी, खेलाडी, प्रशिक्षक, निजामती, जङ्गी, चिकित्सक, विदेशी नागरिकलगायतलाई मानपदवी प्रदान गरिएको थियो ।

Advertisement

मन्त्रिपषिद्को सिफारिसमा तत्कालीन राष्ट्रपति विद्यादेवी भण्डारीले २०७९ असोज ३ गते संविधान दिवसका दिन उक्त विभूषणको घोषणा गरेकी थिईन् । नेपालको संविधानको धारा २७७ को उपधारा १ मा राष्ट्रपतिले राज्यका तर्फबाट प्रदान गरिने उपाधि, सम्मान र विभूषण प्रदान गर्ने उल्लेख छ ।

पदकका नाममा राज्यको ढुकुटीबाट करोडौं खर्च हुने गरेको पाइएको छ । सरकारले तामझामसाथ वर्षेनी बाँड्ने गरेको मानपदमी, अलंकार र पदक वितरणमा वितेको तीन वर्षको अवधिमा ३४ करोड ५८ लाख रुपैयाँ खर्च गरेको छ ।

महालेखा परीक्षकको प्रतिवेदनअनुसार आर्थिक वर्ष २०७६/७७, २०७७/७८ र २०७८/७९ सम्म यो रकम खर्च भएको हो । तीन वर्षको अवधिमा सरकारले १५ सय ७३ जनालाई तक्मा बाँडेको छ । यसका लागि ३४ करोड ५८ लाख रुपैयाँ खर्च भएको छ । यसमध्ये २७४ जनाले तक्मा बुझेका छैनन् ।

विभूषण तयार गर्न लाग्ने लागत वर्षेनी बढ्दै गएको भन्दै महालेखाले लागतमा कमी ल्याउन तथा विभूषित हुने संख्या निश्चित गरी खर्च नियन्त्रण गर्न भनेको छ ।