एमालेमा गुटबन्दी सुरु गर्ने नेता ओली भएको झलनाथ खनालको टिप्पणी

काठमाडाैं- नेकपा एमालेका वरिष्ठ नेता झलनाथ खनालले एमालेमा गुटबन्दी सुरु गर्ने नेता अध्यक्ष केपी शर्मा ओली नै भएको टिप्पणी गरेका छन्।

बुधबार ललितपुरको सानेपामा आयोजित राष्ट्रिय भेलामा बाेल्दै उनले ओलीले पार्टीमा अनेक नाममा गुटबन्दी चलाएको बताए। उनले आफूहरूले नेपालको कम्युनिस्ट आन्दोलन र लोकतान्त्रिक आन्दोलनको विशेष अवस्थामा यो भेला आयोजना गरिरहेको बताए।

ओलीले मनपरीतन्त्र र अहंकारले ग्रस्त भएर पार्टीलाई बेवास्ता गरेर एकलौटी ढंगले अघि बढ्न खोजेको बताए। पार्टी एकीकरणपछि पार्टी जुन ढंगले अघि बढ्ला भन्ने अपेक्षा थियो त्यस अनुसार हुन नसकेको उनको भनाइ छ।

Advertisement

‘हामीले सरकारको शैलीको आलोचना गर्न थाल्यौं। तर, ओलीले पार्टीको बैठकमा सहभागिता नै जनाउन छाड्नुभयो। एमालेमा गुटबन्दी सुरु गर्ने नेता अरु कोही होइन ओली हो’, खनालले भने, ‘मदन भण्डारी फाउन्डेसनमार्फत् ओलीले गुटबन्दी मौलाउने मौका दिनुभयो। त्यसपछि विधि प्रक्रिया मिचिन थाल्यो।’

दुई तिहाइ बहुमतपछि ओलीको नेतृत्वमा सरकार गठन गरिएको तर, ओली नेतृत्वको सरकारले पार्टीको कार्यदिशा, विधि, पद्धतिलाई अस्वीकार गर्ने काम गरेको आरोप लगाए।