युरोप पठाउने भन्दै लाखौं ठगी गरेको आरोपमा कलाकार इकु पक्राउ

काठमाडौं । कलाकारका रूपमा युरोप पठाउने भन्दै ठगी गरेको आरोपमा एकजना पक्राउ परेका छन् । पक्राउ पर्नेमा ललितपुर महानगरपालिका–२४ धापाखेल घर भई काठमाडौंको धुम्बाराही बस्ने ४० वर्षीय सुलेमान शंकर (इकु) भनिने सूर्यमान शंकर रहेका छन् ।

केन्द्रीय अनुसन्धान ब्युरो (सिआइबी)ले पक्राउ गरेको शंकरले विभिन्न देशहरूमा हुने नेपाली सांस्कृतिक कार्यक्रमहरूमा आवश्यक पर्ने कलाकारको रूपमा कलाकार भिसामा क्यानडा, अष्ट्रेलिया तथा युरोपेली देशहरूमा लैजाने भन्दै ठगी गरेको आरोप लागेको पाइएको प्रहरीले जनाएको छ ।

विशेषगरी भौगोलिक रूपमा विकट क्षेत्रका मानिसहरूलाई युरोपेली मुलुकहरूमा राम्रो काम पाइने र आम्दानी समेत हुने प्रलोभन देखाएर उनले सञ्चालन गरिरहेको एसएमएस फिल्म्स प्रालीको नाममा ग्लोबल आइएमई बैंकमा रहेको खातामा रकम जम्मा गर्न लगाउने गरेको आरोप छ ।

Advertisement

प्रहरीका अनुसार खातामा १५ देखि २० लाख सम्म जम्मा गर्न लगाएको खुलेको हो ।

विदेशी मुलुकमा भिसा प्रयोजनका लागि आवश्यक पर्ने बैंक स्टेटमेन्ट लगायतका कागजातहरू समेत नक्कली बनाउने गरेको र रकम जम्मा गर्ने पीडितहरूले भिसा तथा जाने मितिको बारेमा सोधपुछ गर्दा विदेशमा कार्यक्रमको लागि तयार हुँदैछ तयार भएपछि खबर गर्छु भनेर झुलाएर सम्पर्कबिहीन भएको खुलेको हो ।

उनीमाथि अनुसन्धान गर्न अदालतबाट ५ दिन हिरासतमा राख्न अनुमति लिएको छ ।

उनीबाट ठगिएका व्यक्तिहरू प्रहरीको सम्पर्कमा आउन पनि सिआइबीले अनुरोध गरेको छ।