अमेरिकाको डिभी परेका सात जना प्रहरीको फन्दामा

२०७९ आश्विन ६

1.8K

काठमाडौं । सपनाको देश अमेरिका जान कतिसम्म बदमासी हुन्छ भन्ने विषयमा प्रहरीले नयाँ तथ्य फेला पारेको छ । अमेरिकाको डाइभर्सिटी भिसा (ईडीभी)परेका सात जनालाई नक्कली शैक्षिक प्रमाणपत्रसहित प्रहरीले पक्राउ गरेपछि घट्ना छताछुल्ल भएको छ ।

ईडीभी २०२१ को नतिजामा नाम निकालेका तर भिसा प्रक्रियाका लागि आवश्यक शैक्षिक योग्यता प्राप्त नगरेका उनीहरूलाई प्रहरीले पक्राउ गरेको हो ।

भिसा प्रयोजनका लागि १०ं२ को नक्कली ‘एकेडेमिक ट्रान्सक्रिप्ट’ बनाएको गोप्य सूचनाको आधारमा अमेरिकी दूतावाससँगको समन्वयमा बुधबार प्रहरी टोलीले उनीहरूलाई महाराजगंजस्थित अमेरिकी दूतावास र काठमाडौंका विभिन्न स्थानबाट नियन्त्रणमा लिएको हो ।

उनीहरूको साथबाट त्रिभुवन विश्वविद्यालय, उच्च माध्यामिक शिक्षा बोर्ड र एनएबीको नाममा जारी भएको नक्कली प्रमाणपत्र बरामद गरिएको प्रहरीले जनाएको छ ।

पक्राउ पर्नेमा काठमाडौंको टोखा बस्ने नुवाकोट बेलकोटगढीकी २५ वर्षीया राधिका तामाङ, काठमाडौंको बसुन्धारा बस्ने स्याङ्जा चापाकोटकी ३८ वर्षीय सबिता श्रेष्ठ, हाल झापाको दमक बस्ने पाँचथर मितलाजुनका २५ वर्षीय समिर राई, कास्की पोखराका ४० वर्षीय अरुण कार्की छन् ।

यसैगरी, झापा मेचीनगरका ४६ वर्षीय विदुर प्याकुरेल, काठमाडौं कागेश्वरीका २१ वर्षीय सुरजराज खत्री र अछाम मंगलसेनका २७ वर्षीय वीरेन्द्रबहादुर रावल नक्कली शैक्षिक प्रमाणपत्रसहित पक्राउ परेको काठमाडौं उपत्यका अपराध अनुसन्धान कार्यालयले जनाएको छ ।