आज मनमोहन अधिकारीको २५औं स्मृति दिवस, विभिन्न कार्यक्रम गरेर मनाइदै

काठमाडौं। नेपालको वाम लोकतान्त्रिक आन्दोलनका नेता तथा प्रथम जननिर्वाचित कम्युनिष्ट प्रधानमन्त्रीसमेत रहेका मनमोहन अधिकारीको २५ औं स्मृति दिवस विभिन्न कार्यक्रम गरि मनाइदै छ ।

अधिकारीको स्मरणमा आज नेकपा एमाले लगायतका कम्युनिष्ट पार्टीहरुले विभिन्न कार्यक्रमहरु आयोजना गर्दैछन् ।

जसअन्तर्गत मनमोहन स्मृति प्रतिष्ठानले बिहीबार विशेष कार्यक्रम आयोजना गरेको छ । कार्यक्रमको प्रमुख अतिथि पूर्वराष्ट्रपति विद्यादेवी भण्डारी सहभागी छिन्।भण्डारीले ‘मनमोहन अधिकारी जीवनगाथा’को विमोचन गर्ने कार्यक्रम रहेको छ । यस्तै, ‘ज्येष्ठ नागरिक देश दर्शन २०८१’ को शुभारम्भ कार्यक्रम सुरुवात गर्ने कार्यक्रम रहेको छ ।

Advertisement

वि.सं. १९७८ सालमा काठमाडौंमा जन्मिएका नेता अधिकारी को २०५६ वैशाख १३ गते निधन भएको थियो । उनको चुनाव प्रचारप्रसारका क्रममा काठमाडौँको गोठाटारमा हृदयाघातबाट निधन भएको थियो । 

उनी २०५१ सालमा देशको पहिलो कम्युनिष्ट प्रधानमन्त्री बनेका थिए । अधिकारी दक्षिण एसियाकै प्रथम कम्युनिस्ट प्रधानमन्त्री तथा नेकपा एमालेका पनि प्रथम अध्यक्षका रूपमा चिनिन्छन् ।

नेता अधिकारी नेतृत्वको ९ महिने सरकारले गरेका कामहरु चर्चित छन् । उनको नेतृत्वको सरकारले वृद्ध भत्ता वितरण गर्न सुरु गरेको थियो भने आफ्नो गाउँ आफैं बनाऔं कार्यक्रम ल्याएको थियो ।