सागर केरुङद्धारा लिखित लिम्बु नाट्यकृति ‘सुनौली रुपौली’ विमोचित

काठमाडौं । रंगकर्मी तथा चलचित्रकर्मी सागर केरुङद्धारा लिखित लिम्बु नाट्यकृति ‘सुनौली रुपौली’ विमोचित भएको छ । आइतबार ललितपुरको किरात याक्थुङ चुम्लुङमा एक कार्यक्रमा आयोजना गरी केरुङको नवौं कृतिको रुपमा नाट्यकृति विमोचन ‘सुनौली रुपौली’ गरिएको हो ।

केरुङका यसअघि ‘नुमाहाङ्मा’, ‘केमाबा लाजे?’, ‘सक्सा नु पेन्युक’, ‘दोश्रो नागरिक’, ‘तियाहा’, ‘पासिभन्ज्याङ’, ‘साक्थिम’ र ‘सैमुन्द्री’ नाट्यकृतिहरु लगायतका पुस्तकहरु प्रकाशित छन् ।

कियाचु, लिम्बु सांस्कृतिक परिषदको आयोजनामा सम्पन्न उक्त कार्यक्रमका प्रमुख अतिथि अल्पाइन युनिभर्सिटी सिक्किमका लिम्बु भाषाका प्राध्यापक कर्णहाङ सुब्बा ताम्लिङ रहेका थिए । यस्तै, विशेष अतिथि कियाचु अध्यक्ष प्रेम येक्तेन, अतिथिहरु निवर्तमान अध्यक्ष योगराज वनेम, पूर्व अध्यक्ष अर्जुन नुगो, मुन्धुमविद येहाङ लावती, ऐतिहासिक व्यक्तित्व वीर नेम्बाङ, पूर्व मेजर जर्णेल होमितकुमार लावती, प्रहरी वरिष्ठ उपरिक्षक (एसएसपी ) चन्द्रकुबेर खापुङ, शसस्त्र पूर्व डिआइजी देवेन्द्र सुब्बा, निर्देशक नवीन सुब्बा, कियाचु नेवाःताम्सा अध्यक्ष भीम नेम्बाङ, पुर्नजीवन केन्द्र अध्यक्ष डा. कमल तिगेला, पान्थरका पूर्व जिल्ला उपसभापति नेता दिनानथ घिमिरे लगायत रहेका थिए ।

Advertisement

‘सुनौली रुपौली’ नाट्यकृतिमाथि बोल्दै प्राज्ञ अमर तुम्याहाङले नाट्यकृतिभित्र संवादको शैलीमा विविधता रहेको बताए । सङ्ग्रह भाषा र शैलीको हिसाबले लोक लयमा रहेको तर लेखनमा भने ‘कन्फ्युजन’ रहेको बताए ।

यस्तै, अर्का अतिथि वीर नेम्बाङले यस नाट्यकृतिबाट लेखक सागर केरुङ नारीमैत्री लेखकको रुपमा चिनिएको बताए । उनको कृतिहरु नारीप्रधान हुने भएकोले उनलाई नारीमैत्री लेखक मान्न सकिने उनको भनाइ थियो । सङ्ग्रहको नाम भने ‘सुनौली रुपौली’ नभएर ‘सेम्मुइ’ राखेको भए उचित हुने उनको धारणा थियो ।

अर्का अतिथि मुन्धुमविद येहाङ लावतीले ‘सुनौली रुपौली’ याक्थुङ नाट्यकृति भएता पनि उक्त शब्द याक्थुङ भाषीहरुको ओठमा झुण्डिएको शब्द तर याक्थुङ भाषा नभएको बताए । यो रीत पुर्खाहरुले छैटौं शताब्दिमा सुरुवात गरिएको, जुन रीत अनुसार मन नपरे सम्बन्ध विच्छेद गर्न सकिने व्यवस्था भएको उनको भनाइ थियो ।

यस्तै, कियाचुका अध्यक्ष प्रेम येक्तेनले उक्त नाट्यकृतिका नाटकका केहि दृष्यहरु लिम्बुहरुको संस्कासँग असम्बन्धित रहेको टिप्पणी गरे । ‘हेप्रेक् हेप्मा’ (ग्वाम्म अंगालो हाल्नु) यस्तो प्रवृद्धि लिम्बु संस्कारमा नभएको, तर रातभर धान नाचेर बिहान इमान्दारपूर्वक छुट्ने समुदायको संस्कार रहेकोमा नाटकमा प्रयोग हुन आएको ‘हेप्रेक् हेप्मा’ अलिक फरक भएको बताए । यस्तै, फरक प्रसंगमा अध्यक्ष येक्तेनले प्रदेश १ को नाम लिम्बुवान–किरात राख्ने पहलमा जोड दिनुपर्ने उल्लेख गरे । सांसदहरुले लिम्बुवान–किरात राखे याक्थुङहरुको शीर उच्च हुने उनको भनाइ थियो ।

यस्तै, प्रमुख अतिथि अल्पाइन युनिभर्सिटी सिक्किमका लिम्बु भाषाका प्राध्यापक कर्णहाङ सुब्बा ताम्लिङले लेखकलाई कार्यक्रममा आएका समिक्षालाई आत्मसाथ गर्न सुझाए । सुझावलाई प्रतिशोधको रुपमा नलिइ आजको समिक्षालाई ध्यानमा राखी फिल्म बनाउदा उक्त सुझावहरुलाई ख्याल गर्न सुझाएका छन् ।

कलाकार तथा मुन्धुमवीद यासेली योङहाङले संचालन गरेको उक्त कार्यक्रमको समापन लिम्बु सांस्कृतिक परिषद्का अध्यक्ष तथा कार्यक्रमका सभाध्यक्ष गोविन्द आङ्बुङले गरेका थिए ।

कार्यक्रम विमोचनका लागि आर्थिक सहयोग गरेका निर्देशक हाङ चेम्जोङ र भीम तुम्बाहाम्फेलाई भने लिम्बु सांस्कृतिक परिषदले सम्मानपत्र दिई सम्मान गरेको थियो ।