पाँचथर । कोशी प्रदेश नामांकनको विरोध जनाउँदै आन्दोलन गरिरहेको पहिचानवादी युवा दस्ताले पाँचथरको सदरमुकाम फिदिममा लट्ठी बोकेर मार्च पास गरेका छन् । प्रदेश न १ पुनः नामकरण सयुक्त संघर्ष समितिको आह्वानमा मार्च पास भएको हो । समितिले पाँचथर जिल्ला स्थित विभिन्न गाउँबाट युवाहरू भेला गरि १ हजार १ सय ११ सदस्यीय पहिचानका लागि युवा दस्ता घोषणा गरेको छ ।
युवा नेता नुनाम केरुङ संयोजक, कृष्ण बेघा, सुरेन्द्र लावती, आषिश राई लगायत सह–संयोजक रहेको १ हजार १ सय ११ सदस्यीय युवा दस्ता घोषणा गरिएको बताईएको छ ।
फिदिम माविको खेलमैदानमा भेला भएका युवाहरूले पहिचानका लागि युवा लेखिएको सेतो टिसर्ट लगाएका थिए ।
प्रदेशको नाम कोशी अस्वीकार्य भएकाले आन्दोलनको माहोल बढाउन युवा दस्ता घोषणा भएको दाबी गरिएको छ । प्रदेशका १४ वटा जिल्लामा दस्ता घोषणा गर्ने कार्यक्रमअनुसार पाँचथरमा मार्चपास गराइएको केन्द्रीय उप–कमाण्डर एविराज आङदेम्बेले बताए ।
विभिन्न ठाउँबाट भेला भएका युवाहरूले कोशी नामकरण फिर्ता लिन माग गर्दै नाराबाजी गरेका थिए । सदरमुकाम फिदिममा विभिन्न चोकमा परिक्रमा गरी फेरि खेलमैदान पुगेर दस्ता घोषणाको कार्यक्रम राखिएको थियो । जेठ–१३ गतेबाट पहिचानका लागि युवा दस्ता गठन गर्न थालिएको बताइएको छ । सांकेतिक विरोध जनाउन लठ्ठि बोकिएको सयुक्त संघर्ष समिति पाँचथरका संयोजक सुवास तुम्बापो काङसोरेले जानकारी दिए ।
उनीहरुले विहिवार पाँचथरका चतुरे, जोपोखरी, गोपेटार, च्याङथापु, थर्पु लगायतका बजारमा मसाल जुलुस गर्ने घोषणा गरेका छन् ।