साकेला गाउँपालिकामा टोलस्तरीय शिविरबाट ७ सय बढीले पाए सेवा

साकेला । टोलस्तरका नागरिकहरुको समस्यालाई मध्यनजर गर्दै साकेला गाउँपालिकामा सञ्चालन गरिएको टोलस्तरीय घुम्ती शिविरबाट ७ सय ५८ जना नागरिकहरुले सेवा लिएका छन् । भौगोलिक विकटताका कारण वडा तथा पालिकाको केन्द्रमा पुगेर सेवा लिन नसक्ने नागरिकहरुको लागि गाउँपालिकास्थित वडा नम्बर १ को आयोजनामा गत शुक्रबारदेखि विभिन्न टोलहरुमा घुम्ती शिविर सञ्चालन गरिएको थियो ।

सामाजिक सुरक्षा भत्ता नवीकरण, प्राथमिक स्वास्थ्य सेवा र भूमी कर संकलन सम्बन्धी सेवा प्रदान गर्न सञ्चालन गरिएको शिविरबाट टोलस्तरका नागरिकहरु लाभान्वित बनेका छन् । शिविरमा सामाजिक सुरक्षा भत्ता प्राप्त गर्ने २ सय ४३ जना लाभग्राहीले भत्ता नवीकरण गराएका छन् । त्यस्तै २ सय ९० जनाको शारीरिक परीक्षण तथा औषधी वितरण गरिएको छ भने २ सय ५५ घरधुरीले जग्गाको कर शिविरस्थलमानै बुझाएका छन् ।

भौगोलिक रुपमा अत्यन्तै विकट मानिएको साकेलाको वडा नम्बर १ अन्तर्गतको विभिन्न टोलहरुमा गत शुक्रबादेखि सञ्चालन गरिएको शिविर आईतबार सम्पन्न भएको छ । जसअन्तर्गत शुक्रबार सेखुवास्थित डाँडागाउँमा सञ्चालन गरिएको शिविरमा ६४ जना जेष्ठ नागरिक, अशक्तता भएका व्यक्ति र भत्ता प्राप्त गरिरहेका लक्षित लाभग्राहीले सामाजिक सुरक्षा भत्ता नवीकरण गराएका थिए भने १ सय ५० जनाको स्वास्थ्य परीक्षण र ९२ घरधुरीले जग्गाको कर सम्बन्धी सुविधा प्राप्त गरेका थिए ।

Advertisement

शनिबार वडा कार्यालय बाँझेमा सञ्चालन गरिएको शिविरमा ६२ जना लाभग्राहीको सामाजिक सुरक्षा भत्ता नवीकरण गरिएको थियो भने ४६ जनाले मालपोत कर बुझाएका छन् । सो स्थानमा ५६ जनाले स्वास्थ्य सुविधा प्राप्त गरे । आईतबार चण्डेश्वरी आधारभूत विद्यालयमा सञ्चालन गरिएको शिविरबाट ७० जना लाभग्राहीले सामाजिक सुरक्षा भत्ता नवीकरण गराएका छन् भने ३९ जनाले स्वास्थ्य परीक्षण गराउनुका साथै ३५ घरधुरीले जग्गाको कर बुझाउने सुविधा प्राप्त गरे ।

त्यस्तै सोही वडाको डाँडागाउँस्थित सरस्वती आधारभूत विद्यालयमा सञ्चालन गरिएको शिविरबाट सामाजिक सुरक्षा भत्ता प्राप्त गर्ने ४७ जनाले नवीकरणको सुविधा प्राप्त गरे भने ५२ घरधुरीले जग्गाको कर बुझाउने सुविधा प्राप्त गरे । सो स्थानका ४५ जना नागरिकले स्वास्थ्य परीक्षण सुविधा पाएका छन् ।

नागरिकको सेवाको लागि आवश्यकता अनुसार गाउँगाउँ र टोलटोलमा पालिकाले सेवा पुर्याईरहेको साकेला गाउँपालिका प्रमुख रवि प्रकाश राईले बताए । जनताको आवश्यकतालाई पहिचान गरि अन्य सेवाहरु पनि क्रमिक रुपमा टोल–टोलबाटै प्रदान गरिने उनको भनाई छ ।

शिविरस्थलमा उपस्थित वडा नम्बर १ का वडाध्यक्ष हेमन राईले नागरिकको सुविधाका लागि टोलस्तरमा विभिन्न सरकारी सेवाहरु प्रदान गर्दै लगिने बताए । ‘गाउँपालिकाको अन्य वडाको तुलनामा यस वडा भौगोलिक रुपमा विकट र ठूलो भएका कारण विभिन्न सेवाहरु टोल तथा वस्तीस्तरबाट प्रदान गर्ने कोशिष गरिने छ’, उनले भने, ‘भौतिक विकास सँगसँगै सरकारबाट प्रदान हुने सेवाहरु क्रमिक रुपमा प्रदान गरिनेछ ।’

पालिका र वडा कार्यालयले टोलमा नै विभिन्न प्रकारका सेवा उपलब्ध गराउँद नागरिकले प्राप्त गर्ने सेवा सहज भएको डाँडागाउँका स्थानीय चन्द्रबहादुर राईले बताए । उनले भने, ‘आफूले उपयोग गर्दै आएको जग्गाको कर सात वर्ष अघिदेखि बुझाउन पाएको थिईनँ, टोलमै यो सुविधा ल्याईदिनुभयो । आगामी दिनमा पनि टोलटोलमा यस्तै सेवा निरन्तर उपलब्ध गराईदिनुहोला ।’

चण्डेश्वरी आधारभूत विद्यालयका प्रधानाध्यापक दिलबहादुर देउजाले नागरिकको सुविधाका लागि वडा तथा पालिकाले निरन्तर सेवामुखी कार्यहरु गर्दै आएको उल्लेख गरे । आगामी दिनमा पनि टोल तथा बस्तीहरुमा सरकारी सेवा उपलब्ध गराउन उनले आग्रह गरे ।

शिविरस्थलमा वडा नम्बर १ का वडा सचिव नमी राई, सामाजिक सुरक्षा तथा पञ्जीकरण शाखा संयोजक डिएम चाम्लिङ राई, वडाका अन्य कर्मचारी तथा स्वास्थ्यकर्मीहरुको उपस्थिती रहेको थियो ।