लिज ट्रस बेलायतको नयाँ प्रधानमन्त्रीमा नियुक्त

लन्डन । ब्रिटिश महारानी एलिजाबेथ द्वितीयले सत्तारुढ कन्जरभेटिभ पार्टीकी नयाँ नेता मेरी एलिजाबेथ ट्रस (लिज ट्रस)लाई बेलायतको नयाँ प्रधानमन्त्री नियुक्त गरेकी छिन्।

मंगलबार स्कटल्याण्डको बाल्मोरल क्यासलमा दर्शन भेटपछि महारानीले लिज ट्रसलाई प्रधानमन्त्री पदमा नियुक्त गरेकी हुन्। मार्गरेट थ्याचर र टरिजा मे पछि ब्रिटेनको प्रधानमन्त्री हुने ट्रस तेस्रो महिला हुन्। यसअघि प्रधानमन्त्री बोरिस जोनसनले ब्रिटिश महारानी समक्ष आफ्नो पदबाट राजीनामा दिएका थिए।

सत्तारुढ दलको नयाँ नेता

Advertisement

सत्तारुढ कन्जरभेटिभ पार्टीका १४१,००० भन्दा बढी सदस्य तथा सांसदहरुले गरेको मतदानबाट लिज ट्रस दलको नेता छनोट भएकी हुन्। कोभिडको प्रतिबन्ध लागेको बेला आफ्नो सरकारी निवासमा पार्टी गरेको भनेर आलोचना खेपेका प्रधानमन्त्री बोरिस जोनसनले गत जुलाई महिनामा पदबाट राजीनामा दिने घोषणा गरेका थिए।

लिज ट्रसले खसेको मतको ५७ प्रतिशत मत पाएकी थिइन् भने पूर्व अर्थमन्त्री ऋषि सुनकले ४२ प्रतिशत मत पाएका थिए । सोमबार अपरान्ह लन्डन वेस्टमिन्स्टरमा उक्त घोषणा गरिएको थियो। उक्त घोषणा पछि बोल्दै ट्रसले आफुले उर्जाको बढ्दो मूल्यसंग जुध्न र राष्ट्रिय स्वास्थ्य सेवा (एनएचएस)मा सुधार गर्ने कामलाइ प्राथमिकता दिने बताइन्।

बेलायतको अक्सफोर्डमा जन्मिएकी ४७ वर्षीय ट्रसले अक्सफोर्ड विश्व विद्यालयबाट स्नातक अध्ययन पुरा गरेकी छन्। उनी सन् २०१० मा पहिलो पटक ब्रिटिश संसद, हाउस अफ कमन्स, मा निर्वाचित भएकी थिइन्।

उनले शिक्षा, वातावरण, अन्तर्राष्ट्रिय व्यापार तथा परराष्ट्र मन्त्रीको रुपमा काम गरिसकेकी छिन् । नवनियुक्त प्रधानमंत्री ट्रसले करका दरहरु नबढाउने बरु कर कटौती गर्ने जनाएकी छन्। तर त्यसले गर्दा महंगी अरु बढ्न सक्ने जानकारहरु बताउँछन्।