April 24, 2024, Wednesday
२०८१ बैशाख १३
1:37:26 pm

सागका पदक विजेता खेलाडीलाई नगद पुरस्कार

1.5K

काठमाडौं- १३औं दक्षिण एसियाली खेलकुद (साग)का पदक विजेता खेलाडीलाई नेपाल एथलेटिक्स संघले नगद पुरस्कार प्रदान गरेको छ। सोमबार आयोजित कार्यक्रममा पदक विजेता आठ खेलाडीलाई संघले पुरस्कृत गरेको हो।

एथलेटिक्स संघले १३औं सागका स्वर्ण पदक विजेतालाई एक लाख, रजत विजेतालाई ३५ हजार र कांस्य पदक विजेता खेलाडीलाई जनही २० हजार नगद पुरस्कार प्रदान गरेको हो। 

पदक विजेता खेलाडीलाई राष्ट्रिय खेलकुद परिषद्का निमित्त सदस्यसचिव एकेन्द्र कुँवर, बागमती प्रदेशका सदस्यसचिव सूर्य भण्डारी, एथलेटिक्स संघका अध्यक्ष राजीवविक्रम शाह र पूर्व सभासद कल्पना चौधरी (बस्नेत) ले पुरस्कार प्रदान गरेका थिए।

Advertisement

दुई वर्षअघि नेपालमा आयोजना भएको १३औं सागमा नेपालले एथलेटिक्समा तीन स्वर्ण, एक रजत र चार कास्य पदक जितेको थियो। सन्तोषी श्रेष्ठले १० हजार मिटर, गोपीचन्द्र पार्कीले पाँच हजार मिटर र किरणसिंह बोगटीले म्याराथनमा स्वर्ण पदक जितेका थिए। 

यसैगरी पुष्पा भण्डारीले महिलातर्फको म्याराथनमा रजत पदक जितेकी थिइन्। यसैगरी सोमबहादुर कुमालले आठ सय मिटर, टंक कार्कीले १५ सय मिटर, हरिकुमार रिमालले पाँच हजार मिटर र दीपक अधिकारीले १० हजार मिटर दौडमा कास्य पदक जितेका थिए।

सोही कार्यक्रममा अल इन्डिया जुनियर एथलेटिक्स च्याम्पियनसिपमा सहभागी हुन जाने अजितकुमार यादवलाई पनि बिदाई गरिएको थियो। 

उनले १५ सय मिटर दौडमा प्रतिस्पर्धा गर्ने छन्। यसैगरी केन्याको नौरबीमा आयोजना हुने वल्र्ड यू–२० जुनियर एथलेटिक्स च्याम्पियनसिपमा पनि अजितले सहभागिता जनाउने छन्। उनले तीन हजार मिटर दौडमा प्रतिस्पर्धा गर्ने छन्। 

अजितले सन् २०१८ मा हङकङमा आयोजना भएको एसियन जुनियर एथलेटिक्स च्याम्पियनसिपको म्याराथनमा स्वर्ण पदक जितेका थिए।