March 2, 2024, Saturday
२०८० फाल्गुन १९
1:37:26 pm

कीर्ते गरी बैंकबाट ७० लाख झिकेको आरोपमा महन्थ जगन्नाथ दास वैष्णव पक्राउ

2.2K

काठमाडौं । ७० लाख कीर्ते गरी झिकेको आरोपमा प्रहरीले महोत्तरी जिल्लाको मटिहानी गुठीका महन्थ जगन्नाथ दास वैष्णवलाई पक्राउ गरेको छ । महन्थ वैष्णवले रुपन्देही जिल्ला अवस्थित मेगा बैंक शाखाबाट रु ७० लाख कीर्ते गरी झिकेको आरोपमा लक्ष्मी नारायण मठबाट आइतबार बिहान पक्राउ गरिएको प्रहरीले जनाएको छ ।

महन्थ वैष्णवको नाममा रुपन्देहीस्थित मेगा बैंकको खातामा रहेको रु ७० लाख मौज्दात भएको खाता सरकारले रोक्का राखेको अवस्थामा त्यहाँका सहायक प्रमुख जिल्ला अधिकारीको हस्ताक्षर कीर्ते गरी खाताबाट सो रकम झिकेको आरोप छ । रुपन्देही जिल्ला अदालतको पक्राउ पुर्जीको आधारमा वैष्णवलाई पक्राउ गरिएको हो ।

रुपन्देही जिल्लामा रहेको मटिहानी स्थानको रामजानकी कुट्टीको करोडौँ मूल्य पर्ने जग्गा बिक्री गरेपछि अख्तियार दुरुपयोग अनुसन्धान आयोग सहितका अन्य निकायहरूमा मुद्दा परेपछि महन्थ दासको नाउँमा रहेको बैङ्क खाता तथा अन्य सम्पत्तिहरु रोक्का भएको थियो । यस अघि गुठी संस्थानले महन्थ दासको महन्थ पदलाई खारेज गरेको भएपनि उनी अदालतबाट स्थापित भएका थिए ।

Advertisement

महन्थ दासको नाउँमा रहेको रुपन्देही जिल्लाको सिद्धार्थ नगरमा रहेको मेघा बैङ्क शाखामा रहेको खाता रोक्का रहेको वेलामा रुपन्देहीका सहायक प्रमुख जिल्ला अधिकारी रामचन्द्र अर्यालको कार्तिक ४ गते कीर्ते सही सहितका कागजात बनाएर बैङ्कमा फुकुवा पत्र पठाउँदै ७० लाख १८ हजार ५ सय १० रुपैयाँ ३५ पैसा जनकपुरधामका श्रवण यादवको नाउँमा ट्रान्सफर गरेका थिए ।

सोही विषयमा खोज तलास हुँदै गएपछि महन्थ दासले सहायक प्रमुख जिल्ला अधिकारी अर्यालको दस्तखत किर्ते गरि सही छाप गरेर रकम झिकेको रहस्य सार्वजनिक भएपछि जिल्ला प्रशासन कार्यालयले मुद्दा दिएपछि महन्थको विरुद्धमा रुपन्देही अदालतले पक्राउ पूर्जी जारी गरेका थिए ।

रुपन्देही जिल्ला अदालतको आदेशमा सोही जिल्लाको प्रहरी कार्यालयको पत्रका आधारमा महन्थ दासलाई पक्राउँ गरेर आजै रुपन्देही जिल्ला पठाउने काम भएको महोत्तरीका प्रहरी उपरीक्षक कृष्ण पंगेनीले जानकारी दिए । रेडियो नेपालको आधिकारिक अनलाइनले समाचार सप्रेषण गरेको छ ।