May 21, 2024, Tuesday
२०८१ जेष्ठ ८
1:37:26 pm

केटा पक्षले ‘इन्गेजमेन्ट’ रद्द गर्दा युवतीले आफ्नै शरीरमा आगो लगाइन

1.7K

काठमाडौं । दुवै पक्षवीच विवाह गर्ने सहमतिपछि भएपछि केटा पक्षले ‘इन्गेजमेन्ट’ रद्द गर्दा युवतीले आफू अपमानित भएको महसुस गर्दै केटाको घरमा पुगेर आत्मदाह गरेकी छन् । काठमाडौंको बानेश्वरकी २६ वर्षीया पुष्पा न्यौपानेले धुम्बाराहीस्थित केटाको घरमा आइतबार साँझ पेट्रोल छर्किएर आफ्नै शरीरमा आगो लगाएकी प्रहरीले दावी गरेको छ । तर परिवारका सदस्यहरूले भने केटाका परिवारले पुष्पालाई आत्महत्या गर्न लगाएको वा परिवारका सदस्यहरूले नै पेट्रोल छर्केर हत्या गरेको आशङ्का गरेका छन् ।

शरीरमा आगो लागेको अवस्थामा प्रहरीले पुष्पालाई तत्काल उद्धार गरेर त्रिवि शिक्षण अस्पताल पठाएको थियो । त्यहाँ उपचार हुन नसकेपछि पुष्पालाई कीर्तिपुरस्थित वर्न अस्पतालमा लगिएको थियो । सोमबार बिहान पुष्पाको मृत्यु भएको छ । पुष्पाका काका उत्तम न्यौपानेका अनुसार पुष्पा जलेको अवस्थामै सुदन सङ्ग्रौलाका परिवारले देखेको र आफूहरूलाई खबर समेत गरेको तर उद्धार गरेका थिएनन् ।

एक वर्षअघिदेखि प्रेम सम्बन्धमा रहेका पुष्पा र झापा घर भई धुम्बाराही बस्ने सुधन संग्रौलाबीच परिवारकै सहमतिमा इन्गेजमेन्ट भएको थियो । यही बीचमा उनीहरूको सम्बन्धमा दरार आएपछि गत शनिबार इन्गेजमेन्ट रद्द गरिएको काठमाडौं प्रहरी परिसरले जनाएको छ । ‘इन्गेजमेन्ट रद्द भएपछि घरमा बोलाएर टर्चर दिने काम भयो जसका कारण पुष्पाको ज्यान गयो, उनीहरूलाई छानबिन गर्नुपर्छ’, पुष्पाका काका न्यौपानेले भने ।

Advertisement