प्रदेश पुनःनामाङ्कनको सन्दर्भमा दमकमा अभिमुखी कार्यक्रम

दमक । प्रदेश नं. १ पुनः नामाङकन संयुक्त संघर्ष समिति, जिल्ला समन्वय, झापाले अभिमुखी कार्यक्रम गरेको छ ।

आदिवासी अभियन्ता डा. कृष्णबहादुर भट्टचन र अधिवक्ता शंकर लिम्बू प्रमुख वक्ता रहेको कार्यक्रममा झापास्थीत किरात भवन दमकमा सम्पन्न भएको हो ।

प्रदेश नं. १ को नाम कोशी खारेजी र पहिचानको आधारमा प्रदेश नं. १ को पुनः नामाङकन हुनुपर्छ भन्ने मूल नाराका साथ अघि बढिरहेको पहिचानको आन्दोलनको सन्दर्भमा वक्ताहरुबाट प्रवचन भएको थियो ।

Advertisement

मानवशास्त्री तथा आदिवासी अभियन्ता डा. कृष्णबहादुर भट्टचनले पहिचानको आन्दोलनलाई अपहेलना गर्ने दलहरु आफै समाप्त भएर जाने चेतावनी दिए । उनले प्रदेश नं १ को नामकरण पहिचान विरोधी भएकाले त्यसलाई स्वीकार्न नसकिने स्पष्ट पारे । आदिवासीको पहिचान आन्दोलन सफल भएर छाड्ने उनको भनाई थियो ।

उनले नेपालको आदिवासी आन्दोलन सफल भए भारत लगायत एसियाकै आदिवासी आन्दोलन सफल हुने र यसले अन्तर्राष्ट्रिय आदिवासीको आन्दोलनका लागि नमुना हुने दावी गरे ।

प्रमुख वक्ताका रुपमा रहेका डा.भट्टचनले आदिवासीका आवाज वा मुद्दाका विषयमा नश्लीयवादी चिन्तन बोकेका दलहरुले छेकथुन गरेको हुँदा उर्लिएको पहिचानवादीको भेलले कोशीलाई काशीमा पुर्याइदिने तथ्याङ्क सहित आफ्नो राय राखेका थिए ।

अभिमुखिकरण कार्यक्रममा लाहुरनिपका महासचिव शंकर लिम्बूले नेकपा माओवादी केन्द्र, नेपाली कांग्रेस पहिचानको पक्षमा आउँदै गर्दा एमालेको एकलौटी ढिप्पीपन स्वीकार्य नहुने बताए ।

अधिवक्ता लिम्बूले कोशी प्रदेश छलफल बिना आएको हुँदा जसले स्वीकृत गर्र्यो, उसैले सदनबाट फिर्ता नलिएको खण्डमा यो भन्दा ठूलो विद्रोह हुने चेतावनी दिए ।

झापा र मोरङ संघर्ष समितिद्वारा आयोजित कार्यक्रममा उपस्थित अन्य वक्ताहरुले कानुन सम्मत शान्तिपूर्ण विरोध सभालाई छेकथुन गर्नु प्रहरी प्रशासनको दमन स्वीकार्य नभएको बताउँदै हतियारबाटै आन्दोलनकारीलाई तह लगाउने हो भने सुरक्षित हुन आदिवासीले पनि हतियार उठाए त्यसको जवाफ राज्य सत्ताले दिन सक्छ ? भनेर प्रश्न गरे ।

झापा संघर्ष समितिका अध्यक्ष पाण्डवलाल चौधरीको सभापतित्वमा भएको कार्यक्रममा मोरङ संघर्ष समितिका अध्यक्ष रामभक्त कुरुम्बाङले स्वागत गर्दै उद्देश्यमाथि प्रकाश पारेका थिए ।