July 26, 2021, Monday
२०७८ श्रावण ११
1:37:26 pm

पूर्व माओवादी नेताले दिएको उजुरी निर्वाचन आयोगद्वारा खारेज, माओवादी केन्द्रले पायो वैधानिकता

230

काठमाडौँ– पूर्व माओवादी नेताहरूले माओवादी केन्द्रको वैधानिकतामाथि प्रश्न उठाउँदै दिएको निवेदनलाई निर्वाचन आयोगले खारेज गर‍ेको छ ।

उक्त निवेदनबारे ‍निर्णय गर्दै आयोगले माओवादी केन्द्र वैधानिक रहेको ठहर गरेको हो ।

आयोगको आज भएको बैठकले माओवादी केन्द्रको वैधानिकतामाथि प्रश्न उठाउँदै दर्ता भएका निवेदन र दावी दुवैलाई खारेज गरेको छ ।

नेपालको संविधान, प्रचलिन कानून, राजनीतिक दल सम्बन्धी ऐन र उपलब्ध तथ्यहरूका आधारमा नेकपा माओवादी केन्द्रको विद्यमान अस्तित्व वैधानिक रहेको ठहर भएको आयोगका सचिव सुरेश अधिकारीले जानकारी दिए ।

अधिवक्ता सरोज बुढाथोकीसहितको निवदेनमा माओवादी केन्द्रको वैधानिकताबारे प्रश्न उठाइएको थियो । पूर्वमाओवादी नेताहरू रामबहादुर थापा, टोपबहादुर रायमाझी, प्रभु साह, मणि थापा, लेखराज भट्टलगायतले माओवादी केन्द्र अवैधानिक भएको दाबी गर्दै आयोगमै पुगेर उजुरी गरेका थिए ।

आयोगले पूर्वमाओवादी नेताहरूको दाबीलाई अस्वीकार गरेको हो । त्यस्तै, माओवादी केन्द्र आफू मातहत रहेको भनी भविश्वर पराजुलीले दिएको निवेदन पनि आयोगले खारेज गरेको छ ।