July 26, 2021, Monday
२०७८ श्रावण ११
1:37:26 pm

फुल्चोकी जानेहरुलाई प्रहरीको कडाई

755

ललितपुर: ललितपुरको फुल्चोकी डाँडामा वर्षेनी मानिस हराउने गरेका छन् । कतिपय व्यक्तिको त मृत्यु समेत हुने गरेको छ । यस वर्ष भने फुल्चोकी जानेहरुलाई प्रहरीले कडाई गरेको छ ।

फुल्चोकी डाँडामा हिउँ पर्नासाथ त्यसतर्फ जाने मानिसको घुईँचो लाग्छ । काठमाडौं उपत्यकाको नजिकै रहेको र आकर्षक स्थान भएकाले पनि त्यसतर्फ जानेको घुईँचो लाग्ने गरेको हो ।ललितपुरको गोदावरी नगरपालिका वडा नं. ३ मा पर्ने फुल्चोकी डाँडा २ हजार ६९१ मिटर उचाईमा छ । जाडो याममा हिउँ पर्ने कारण आन्तरिक पर्यटकको घुईँचो लाग्ने गर्छ ।

आइतबार बिहानबाट महानगरीय प्रहरी प्रभाग बाडेगाउँले फुल्चोकी प्रवेश गर्नेहरुलाई सचेत गराएर मात्र पठाउने गरेको छ । आइतबार मात्र फुल्चोकी ५ सय बढी गएको रेकर्ड प्रहरीसँग छ । प्रहरीले गोदावरी बसपार्क नजिकै दैनिक चेकजाँच गर्ने, पर्यटकको विवरण राख्ने गरेको छ । साथै, जंगल प्रवेशका क्रममा हराउने समस्याबारे सचेत गराउने, भौगोलिक अवस्थिति झल्किने नक्सा सहितको बोर्ड, सचेतनामुलक बोर्डहरु राखेर जानकारी गराउने गरेको ललितपुर प्रहरीले जानकारी दिएको छ ।

पैदल जाने पर्यटकहरुलाई दिनको १ बजे र सवारी साधन सहित जानेका लागि दिनको २ बजेसम्म मात्र प्रवेश गर्न दिने गरेका छन् । आइतबार मात्र पनि साँझ ६ बजे दुईजना हराएको सूचना आएपछि प्रहरीले खोजविन गरी उद्दार गरेको छ । उनीहरुलाई गोदावरी नगरपालिका २ चापाखर्कमा फेला पारेका थिए । सिन्धुलीका प्रशान्त थापा र दोलखाका सुरेश केसीलाई उद्दार गरी अभिभावकको जिम्मा लगाएको प्रहरीले जनाएको छ ।