शिक्षकहरुसँगको वार्ता आजै टुङ्गोमा पुर्‍याउन कार्यवाहक प्रधानमन्त्री खड्काको निर्देशन

काठमाडौं। कार्यवाहक प्रधानमन्त्री तथा रक्षामन्त्री पूर्णबहादुर खड्काले आन्दोलनरत शिक्षकहरुसँगको वार्ता आजै टुङ्गोमा पुर्‍याउन सरकारी वार्ता टोलीलाई सुझाव तथा निर्देशन दिएका छन् ।

शिक्षक महासंघको नेतृत्वमा शिक्षकहरूले काठमाडौं केन्द्रित आन्दोलन गरिरहेका छन् । विद्यालय शिक्षासम्बन्धी विधेयकमा भएका कतिपय प्रावधानमा असन्तुष्टि जनाउँदै आन्दोलन गरिरहेका शिक्षकहरूसँगको वार्तालाई सकेसम्म आजै टुङ्गोमा पुर्‍याउन खड्काले सरकारी वार्ता टोलीलाई आवश्यक निर्देशन दिएका हुन् ।

उनले आज बिहान रक्षा मन्त्रालयमा सरकारी वार्ता टोलीका संयोजक उपप्रधानमन्त्री तथा गृहमन्त्री नारायणकाजी श्रेष्ठ, कानुन, न्याय तथा संसदीय मामिला मन्त्री धनराज गुरुङ, शिक्षा, विज्ञान तथा प्रविधि मन्त्री अशोक राई, सञ्चार तथा सूचना प्रविधि मन्त्री रेखा शर्मा, नेपाल सरकारका मुख्यसचिव बैकुण्ठ अर्याल र विभागीय सचिवहरुसँग छलफल गरेका थिए ।

Advertisement

आजको बैठकमा शिक्षकका जायज मागहरु सम्बोधन हुने गरी  वार्तालाई सकेसम्म आजै निष्कर्षमा पुर्‍याउने गरी काम गर्ने विषयमा छलफल भएको थियो ।