May 18, 2022, Wednesday
२०७९ जेष्ठ ४
1:37:26 pm

वीरेन्द्रनगरमा हट्यो निषेधाज्ञा

२०७८ फाल्गुन १७

390

सुर्खेत : वीरेन्द्रनगरमा लगाइएको निषेधाज्ञा मंगलबार हटाइएको छ। अमेरिकी सहायता परियोजना मिलेनियम च्यालेन्ज कर्पोरेशन (एमसिसी) सम्झौताविरुद्ध आन्दोलन उग्र बनेपछि स्थानीय प्रशासनले सोमबार निषेधाज्ञा लगाएको थियो। आज प्रशासनले निषेधाज्ञा हटाएर केही ठाउँलाई निषेधित क्षेत्र घोषणा गरेको छ।

प्रमुख जिल्ला अधिकारी खगेन्द्रप्रसाद रिजालले आज साँझ ७ बजेसम्म लगाइएको निषेधाज्ञाको सट्टा स्थानीय प्रशासन ऐन, २०२८ बमोजिम संवेदनशील स्थानलाई निषेधित क्षेत्र घोषणा गरेका हुन्। साँझ ७ बजेदेखि लागू हुने गरी वीरेन्द्रनगरका हटियालाइन, हटियाचोक, मङ्गलगढी चोक र एरिचोकलाई निषेधित क्षेत्र घोषणा गरिएको छ। ती क्षेत्रमा ५ जनाभन्दा बढी व्यक्ति भेला हुन पाइने छैन।

‘निषेधाज्ञा जारीपछि वीरेन्द्रनगर शान्त नै रह्यो, निषेधाज्ञालाई निरन्तरता दिनुपर्ने अवस्था देखिएन,’ प्रजिअ रिजालले भने, ‘सुरक्षाका दृष्टिकोणले संवेदनशील देखिएका स्थानमा लागू हुने गरी निषेधित क्षेत्र घोषणा गरिएको हो।’ आन्दोलनकारीले सुर्खेतका पार्टी कार्यालय र प्रहरी बिट तोडफोडका साथै आगजनीको प्रयास गरेपछि स्थिति नियन्त्रणमा लिन जिल्ला सुरक्षा समितिको बैठकले निषेधाज्ञा लगाउने निर्णय गरेको थियो।

Advertisement

प्रशासनले वीरेन्द्रनगर क्षेत्रमा लगाएको निषेधाज्ञा साँझ ७ बजे सकिएको छ। जिल्ला प्रशासनका अनुसार अर्को आदेश नहुञ्जेल ती क्षेत्रमा नाराजुलुस गर्न निषेध गरिनेछ। निषेधित क्षेत्रमा सभा, जुलुस गर्न ५ जनाभन्दा बढी व्यक्ति समूहमा उपस्थित भएको पाइए स्थानीय प्रशासन ऐनबमोजिम कारबाही गरिने प्रशासनद्वारा जारी विज्ञप्तिमा उल्लेख छ।