July 29, 2021, Thursday
२०७८ श्रावण १४
1:37:26 pm

दुवै डोज खोप लगाउँदा कोभिडबाट ९८ प्रतिशत सुरक्षा : अध्ययन

230

काठमाडाैं-  कोेभिडको दुवै डोज खोप लगाउँदा यो सङ्क्रमण भएका मानिसहरुलाई मृत्युबाट ९८ प्रतिशतसम्म बचाउन सक्ने एक अध्ययनले देखाएको छ। भारतमा भएकाे सो अध्ययनले उक्त तथ्य देखाएको बताइएको छ।

भारत सरकारले गरेको एक अध्ययनले कोरोना भाइरस विरुद्धको एउटा मात्र खोपले पनि कम्तीमा ९२ प्रतिशत जति सुरक्षा प्रदान गर्ने देखिएको छ। सो अध्ययनले एक डोज मात्र खोप लगाएका व्यक्तिलाई पनि कोरोना भाइरस सङ्क्रमण भएको छ भने उनीहरुलाई ९२ प्रतिशतसम्म मृत्युबाट बचाउने देखिएको हो।

भारतीय सरकारको निकट रहेको एक थिंक ट्यांक संस्था एनआईटीआईले गरेको अध्ययनबाट उक्त तथ्य पाइएकाे बताइएको छ। सो इन्स्टिच्युटका निर्देशक भीके पाउलले नयाँ दिल्लीमा अयोजना भएको पत्रकार सम्मेलनमा उक्त जानकारी दिएका हुन्।

कोरोना विरुद्धको खोपले कोरोना लाग्न नदिनेभन्दा पनि कोरोना लागिसकेपछि मृत्युबाट बचाउन निकै प्रभावकारी रुपमा काम गर्ने देखिएको उनकाे भनाइ छ। सो अध्ययन पञ्जावका प्रहरीमा गरिएको उनले जानकारी  थिए।

पञ्जावमा कोभिडको खोप लगाएका र नलगाएका प्रहरीहरुमा सो अनुसन्धान गरिएको थियो। त्यस्तै त्यहाँका प्रहरी जसले एक डोज मात्र खोप लगाएका र दुवै डोज खोप लगाएकाहरुमा पनि अनुसन्धान गरिएको थियो।

तीमध्ये खोप नलगाएको तुलनामा लगाएका प्रहरीको मृत्यु दर निकै कम थियो। त्यसैगरी दुवै डोज खोप लगाएकामा मृत्युबाट जोगाउनसक्ने ९८ प्रतिशत सुरक्षा रहेको पाइएको थियो।