पटाका कारखानामा विस्फोट हुँदा कम्तीमा २१ जनाको मृत्यु

काठमाडौं। भारतमा शनिबार एक पटाका कारखानामा विस्फोट हुँदा कम्तीमा २१ जनाको मृत्यु भएको छ भने आठ जना घाइते भएका छन्।

भारतीय प्रधानमन्त्री नरेन्द्र मोदीले आन्ध्र प्रदेशको काकिनाडामा भएको उक्त घटनाप्रति दुःख व्यक्त गर्दै मृतकका आफन्तजनप्रति समवेदना व्यक्त गरेका छन् ।

भारतीय सञ्चार संस्था, प्रेस ट्रस्ट अफ इन्डिया (पिटआई) ले राज्यमन्त्री कण्डुला दुर्गेशलाई उद्धृत गर्दै उक्त घटनामा परी कम्तीमा २१ जनाको मृत्यु भएको पुष्टि गरेको छ । थप आठ जनाको अस्पतालमा उपचार भइरहेको दुर्गेशले बताए ।

Advertisement

राज्यका मुख्यमन्त्री एन चन्द्रबाबु नायडुले घटनाको अनुसन्धान सुरु गर्न निर्देशन दिएका छन् ।

विशेष गरी दिवालीको हिन्दू चाड र विवाह उत्सवको समयमा भारतमा पटाका पड्काएर गरिने उत्सव धेरै लोकप्रिय मानिन्छ ।

भारतमा पटाका कारखानामा पटक पटक विस्फोटका घटना हुने गर्छन् तर मानवीय हताहतीका घटनाले पटाकाको उत्पादन र प्रयोगको अभ्यासप्रति प्रश्न चिन्ह खडा गरेको छ ।

गत वर्ष भारतको पश्चिम क्षेत्रमा भएको पटाका कारखानामा विस्फोट हुँदा २१ जनाको मृत्यु भएको थियो ।