July 29, 2021, Thursday
२०७८ श्रावण १४
1:37:26 pm

खाने तेलको भाउ घट्न थाल्यो

210

काठमाडौँ– निरन्तर उकालो लागेको खाने तेलको मूल्य घट्न थालेको छ । तेल उत्पादनका लागि आयात गरिने कच्चा पदार्थको अन्तर्राष्ट्रिय मूल्य घटेपछि खाने तेलको मूल्य घट्न थालेको उद्योगीहरुले बताएका छन् ।

आठ महिनादेखि निरन्तर उकालो लागेको खाने तेलको भाउ पछिल्लो समय घट्दै गएको छ ।

पछिल्लो दुई सातामा भटमास र सूर्यमूखी तेलको बजार मूल्य प्रतिलिटर २० देखि ४० रुपैयाँसम्म सस्तो भएको छ ।

सूर्यमुखी र भटमासको तेलको कच्चा पदार्थ एक मेट्रिक टनमा तीन सय डलरसम्मले सस्तो हुँदा तेलको खुद्रा मूल्य घटेको उद्योगी कुमुद दूगडले बताए ।

नेपालमा भारत, ब्राजिल, अर्जेन्टिनालगायतका देशबाट खानेतेल उत्पादनका लागि कच्चा पदार्थ ल्याइन्छ ।

नेपाल खुद्रा ब्यापार संघका अनुसार यस अघि प्रतिलिटर २६५ देखि २७० रुपैयाँ रहेको सूर्यमुखी प्रशोधित तेलको मूल्य २३५ देखि २४० मा झरेको छ । सूर्यमुखी तेल प्रतिलिटर २३५ रुपैयाँसम्म बिक्री गर्न सकिने मूल्य होलसेलबाट आएको संघका कार्यकारणी सदस्य ध्रुव अधिकारीले बताए । यस्तै २५५ देखि ६० रुपैयाँमा बिक्री भइरहेको भटमासको तेलको मूल्य २२० रुपैयाँमा झरेको छ ।

वाणिज्य विभागले तेलको मूल्य घटेको विषय जानकारी आएको जनाएको छ । विभागका प्रवक्ता शिवराज सेढाईंले मूल्य घटेको जानकारी उद्योगीहरुले गराएको बताए । बजारमा २० देखि ४० रुपैयाँसम्म खुद्रा मूल्य घटेको पाएको उनको भनाइ छ ।