April 14, 2021, Wednesday
२०७८ बैशाख १
1:37:26 pm

पुँजीबजार फोरमद्धारा नेप्सेलाई ३० बुँदे सुझाव

205

काठमाडौं- नेपाल उद्योग वाणिज्य महासंघअन्तर्गत गठित पुँजीबजार फोरमले पुँजीबजार सुधार गर्न भन्दै नेप्सेलाई ३० बुँदे सुझाव दिएको छ।

फोरमले दिएको सुझावमा ‘डेरिभेटिभ’ र ‘अक्सन मार्केट’ सुरु गर्नुपर्नेदेखि कुनै कम्पनी मर्जर वा प्राप्तिमा जाँदा दोस्रो बजारमा सेयर कारोबार रोक्का नराख्‍नेसम्मका विषय रहेका छन्।

गत माघमा गठन भएको फोरममा महासंघका कार्यकारिणी समिति सदस्य अम्बिकाप्रसाद पौडेल सभापति र पूर्वसदस्य रामशरण थपलिया सहसभापति रहेका छन्। निर्माणकुमार श्रेष्ठ, मेखबहादुर थापा, सन्तोष मैनाली, प्रियराज रेग्मी, विष्णुप्रसाद बस्याल, राजन लम्साल र ज्योति सदस्य छन्।

यी हुन् नेपाल उद्योग वाणिज्य महासंघले नेप्सेलाई दिएका सुझावहरु:
१. नेपाल स्टक एक्सचेन्ज (नेप्से) को सम्पूर्ण विनियमावली समयानुकूल संशोधन गर्ने।
२. बजार मूल्यको आधारमा ‘टिक साइज’ निर्धारण गर्ने। 
३. अन्तरदिन कारोबार (इन्टर डे ट्रेडिङ) सुरु गर्ने। 
४. हकप्रदको निस्सा कारोबार गराउने। 
५. मार्जिन ट्रेडिङसम्बन्धी नीतिमा ‘रिस्क बेस्ड लोन टु भ्यालएसन (एलटिभी)’को व्यवस्था गर्ने। 
६. ब्लक डिल र बल्क डिलका लागि छुटै विन्डोको व्यवस्था गर्ने। 
७. धितोपत्र नै ऋणका रुपमा लिन दिने व्यवस्था गर्ने।
८. ओटिसी बजारलाई विस्तार तथा अनलाइनमा आधारित गर्ने।
९. सूचीकृत कम्पनीको संस्थापक सेयर किनबेच गर्नका लागि ओटिसीमार्फत गर्ने व्यवस्था मिलाउने। 
१०. वस्तु विनिमय बजार (डेरिभेटिभ मार्केट) को विकास गर्ने। 
११. सबै क्षेत्रको प्रतिनिधित्व हुने गरी नयाँ मानक इन्डेक्स बनाउने। 
१२. कुनै अर्थ नभएको सेन्सेटिभ इन्डेक्स खारेज गर्ने। 
१३. सेयरको सेटलमेन्ट प्रक्रिया ब्रोकर ब्याक अफिसमार्फत अटोमेटेड तरिकाले गर्नुपर्ने। 
१४. एक्सचेन्ज ट्रेडेड फण्ड  (इटिएफ) को व्यवस्था गर्ने। 
१५. अक्सन मार्केट सञ्‍चालनमा ल्याउने। 
१६. भुक्तानी राफसाफ प्रत्याभूति कोषको आकार बढाई कार्यान्वयनमा ल्याउने। 
१७. पुँजीबजारसम्बन्धी मूल्य संवेदनशील सूचना तथा डाटाको सहज पहुँच नेप्सेको वेबसाइटमा उपलब्ध गराउने।
१८. व्यापार व्यवस्थापन प्रणाली (टिएमएस), ब्याक अफिस, रिस्क म्यानेजमेन्ट प्रणाली (आरएमएस) लाई इन्ट्रिगेटेड सिस्टममा रुपान्तरण गर्ने। 
१९. नेप्से, सिडिएस र दलालले उपयोग गर्ने प्रणालीलाई एपिआईमार्फत इन्टिग्रेट गर्ने।
२०. दलाल कम्पनीलाई आफ्नै टिएमएस, ब्याक अफिस र आरएमएस विकास गर्न दिने।
२१. ब्रोकर ब्याक अफिसलाई अनलाइन गरी लगानीकर्तालाई आफ्नो ट्रेड कन्फरमेसन, लेजर र होल्डिङ चेक गर्न पाउने व्यवस्था गर्न पाउने। 
२२. कुनै पनि कम्पनीले सेयर निर्गमन गर्न आवेदन दिनासाथ मस्यौदा विवरणपत्र कम्पनी, बिक्री प्रबन्धक, बोर्ड र नेप्सेको वेबसाइटमा राख्‍नुपर्ने। 
२३. सूचीकरण सम्झौता पूरा नगर्ने संस्थाहरुको कारोबार निलम्वन गर्नुपूर्व कम्पनीलाई कम्तिमा १५ दिन अगाडि सूचना दिई सोको जानकारी नेप्सेको वेबसाइटमा राख्‍नुपर्ने।
२४. सूचीकरण सम्झौता पूरा नगरेर कारोबार निलम्वन गर्नुपरेमा कम्पनीको प्रमुख कार्यकारी अधिकृत तथा सञ्‍चालक समितिलाई वित्तीय तथा अन्य कारबाहीको व्यवस्था गर्नुपर्ने।
२५. मर्जर वा प्राप्ति हुँदा कुनै पनि कम्पनीको कारोबार रोक्का नराख्‍ने।
२६. कुनै पनि दायित्व (आर्थिक) पूरा नगर्ने दलाललाई कारोबार गर्नबाट रोक लगाउनुको सट्टा कम्पनीका कार्यकारी प्रमुखलाई नगद जरिवाना गर्ने। 
२७. कारोबारको फ्लोरसिटमा दलाल नम्बर हटाउने। 
२८. सहायक ब्रोकर, अथोराइज्ड एजेन्ट, बजार विश्लेषक, बजारमा सक्रिय संस्थाका सम्बन्धित कर्मचारीलाई आवश्यकताअनुसार तालिम र प्रमाणपत्र दिने व्यवस्था मिलाउने।
२९. नेप्से र बोर्डले पुँजीबजारसम्बधी तालिम तथा वित्तीय साक्षरता कार्यक्रम सञ्‍चालन गर्ने र सो कार्यक्रम सञ्‍चालनका लागि छुट्टै कोष खडा गर्नुपर्ने। 
३०. सहायक ब्रोकर र अथोराइज्ड एजेन्टको नियुक्ति दलालको सिफारिसमा एक्सचेन्जले गर्ने।