रुपन्देही प्रहरीले पक्राउ गर्‍यो एकैदिन ५ फरार अपराधी

२०७८ जेष्ठ १९

2.2K

काठमाडौं– जिल्ला प्रहरी कार्यालय रुपन्देहीले विभिन्न मुद्दामा दोषी ठहर भई फरार भएका पाँच जनालाई एकै दिन पक्राउ गरेको छ। जिल्ला अदालत रुपन्देहीले कैद सजाय सुनाएपश्चात फरार भएका ५ जनालाई एकै दिन पक्राउ गरिएको हो।

पक्राउ पर्नेहरुमा कर्तव्य ज्यान, बलात्कार र अप्राकृतिक मैथुनीका दोषी छन्। पक्राउ पर्नेहरुमा कर्तव्य ज्यान मुद्दामा १० वर्ष कैद सजाय सुनाइएका रुपा भनिने धनबहादुर बुढाथोकी, कर्तव्य ज्यानमै १० वर्ष कैद सजाय सुनाइएका कन्हैया कुँवर जोगी, बलात्कार मुद्दामा ७ वर्ष कैद सजाय सुनाइएका राजन चौधरी भनिने बेनिराम कँवर जोगी र कर्तव्य ज्यानमै दोषी ठहर भइ १९ वर्ष ३ दिन कैद सजाय सुनाइएका बलु सुनार भनिने बलबीर कुमार सुनार र अप्राकृतिक मैथुन मुद्दामा ४ वर्ष ८ महिना कैद सजाय सुनाइएका बाबुराम विश्वकर्मा छन्।

पक्राउ परेका पाँचै जनालाई जिल्ला अदालत रुपन्देहीमार्फत कैद भुक्तानका लागि कारागार पठाइएको रुपन्देही प्रहरीले जनाएको छ।